विश्रांतीनंतर दोडामार्गात पुन्हा हत्तींचे ठाण; शेतपिकांचे नुकसान

मुंबई (विशेष प्रतिनिधी): जवळपास सहा महिन्यांच्या विश्रांतीनंतर सिंधुदूर्ग जिल्ह्यातील दोडामार्ग तालुक्यामध्ये हत्तींचे पुनरागमन झाले आहे (human-elephant conflict in sindhudurg). कोल्हापूरात काही काळ व्यतीत केल्यानंतर हत्तींचा कळप पुन्हा कोकणात उतरला असून त्यांनी फळबागांमध्ये ठाण मांडले आहे. (human-elephant conflict in sindhudurg)

कोल्हापूरातील आजरा आणि चंदगड भागामधून दोडामार्ग तालुक्यात एक मादी, एक नर आणि तीन पिल्लू असा पाच हत्तींचा कळप दाखल झाला आहे. नारळ पोफळीच्या बागा, तसेच ऊस, केळीच्या पिकांचे ही मोठ्या प्रमाणात नुकसान केले असून शेतकरी हवालदिल झाला आहे. दोन दिवसांपुर्वी म्हणजेच दि. ६ डिसेंबर रोजी दोडामार्ग तालुक्यातील बांबर्डे गावामध्ये एका प्रौैढ नर हत्तीचे दर्शन झाले असून हा हत्ती कोल्हापुरहून आलेला गणेश हत्ती असल्याचे सांगितले जात आहे.

नारळ-पोफळीच्या बागा, केळीच्या बागा तसेच ऊस शेतीचे हत्तींनी मोठ्या प्रमाणावर नुकसान केले आहे. शेतकऱ्यांमध्ये सध्या भितीचे वातावरण पसरलेले आहे. हत्ती येण्याआधीच वनविभागाने उपाययोजना का केल्या नाहीत, असा सवाल आता गावकऱ्यांकडून उपस्थीत केला जात असून शेती पिकांच्या नुकसानाबरोबरच जीवाची चिंता ही आता स्थानिकांमध्ये दिसून येत आहे. वनविभाग हत्ती प्रश्न दुर्लक्षित करतोय का?, पंचनामे करायला ही उशीर का केला जातो?, ठोस उपाययोजना का केल्या जात नाहीत?, हत्ती प्रश्न गांभिर्याने कधी घेतला जाणार? असे अनेक प्रश्न सध्या उपस्थित होत असून शेतीच्या अपरिमीत नुकसानामुळे वनविभागावर गावकरी नाराज असल्याचा सूर उमटताना दिसत आहे.