'कलम ३७०' रद्द करण्याचा निर्णय वैधच; सुप्रीम कोर्टाचा सर्वोच्च निकाल!

जम्मू – काश्मीर या राज्यास पूर्ण नव्हे, मात्र काही बाबतीत सार्वभौमत्व असून त्यास हात लावता येणार नसल्याचा दावा दीर्घकाळपासून करण्यात येत होता. त्यासाठी जम्मू – काश्मीरच्या घटनासमितीचा हवाला देण्यात येत असे. मात्र, जगातील कोणत्याही देशातील एका राज्यास अशाप्रकारे सार्वभौमत्व नाही. त्यामुळे सर्वोच्च न्यायालयानेही असा दावा आजच्या निकालात फेटाळून लावला आहे. भारतातील सर्व राज्ये ही भारताच्या सार्वभौमत्वाच्याच अंतर्गत आहेत. त्यामुळे भविष्यात कोणत्याही राज्यास त्यांना सार्वभौमत्व असल्याचा दावा करता येणार नाही, हा या निकालाचा एक दूरगामी परिणाम आहे. त्याचप्रमाणे जम्मू काश्मीरचे कलम ३७० रद्द करण्यासाठी घटनासमितीच्या मंजुरीची गरज आहे, मात्र आता घटनासमिती अस्तित्वात नसल्याने हे कलम रद्द करता येणार नाही; हादेखील दावा सर्वोच्च न्यायालयाने फेटाळून लावला आहे.