‘कार्बन न्युट्रल कॅम्पस’कडे मुंबई विद्यापिठाची वाटचाल

मुंबई विद्यापिठाचे आवार कार्बन न्युट्रल करण्याच्या दृष्टीकोनातुन विद्यापिठाचा एनएसएस विभागाबरोबर सर्व विभागांनी एकत्र येऊन काम करावे या दृष्टीकोनातुन विभाग प्रमुख आणि इतर प्राध्यापकांना मार्गदर्शन केले जात आहे, अशी माहिती विद्यापिठाचे एनएसएस प्रोग्रॅम ऑफिसर डॉ. विश्वंबर जाधव यांनी सांगितले. मुंबई विद्यापिठाचे कुलगुरू प्राध्यापक रवींद्र कुलकर्णी यांच्या संकल्पनेतुन साकारलेल्या कार्बन न्युट्रल कॅम्पस या प्रकल्पामार्फत आवारात निर्माण होणारा कचरा, प्लास्टिक, कार्बन फुटप्रिंट, वाया जाणारे सांडपाणी यासारख्या विषयांवर काम करून विद्यापिठ कॅम्पस कार्बन न्युट्रल म्हणजेच कार्बन शुन्य करण्यासाठी विद्यापीठ प्रयत्नशील आहे. सप्टेंबर महिन्यात सांडपाण्यावर प्रक्रिया करणारा प्रकल्प सुरू करण्यात आला. त्याचबरोबर वर्मीकंपोस्टींगचा प्रकल्प ही आवारात सुरू करण्यात आलेला आहे. “आपण विद्यापिठात करत असलेला कचरा ही आपलीच जबाबदारी आहे हे लक्षात घेऊन विद्यार्थ्यांमध्ये त्याविषयी जनजागृती करायला हवी”, असे डॉ. नंदकिशोर जोशी यांनी सांगितले. विद्यापिठातील विभागप्रमुखांची बैठक घेऊन त्यांना यामध्ये कोणकोणते उपक्रम करता येतील याबद्दल कृतीआराखडा तयार करण्याचे आवाहन करण्यात आले आहे. प्लास्टिक मुक्त आवार, कार्बन न्युट्रल आवार आणि आवाराचे सुशोभीकरण ही तीन उद्दीष्टे सफल करण्याच्या दृष्टीकोनातुन विद्यापीठ आणि कुलगुरू प्रयत्नशील आहेत.