उद्धव ठाकरेंचे निकटवर्तीय, मंत्री अनिल परबांवर ईडीची धाड!

मुंबई आणि कोकण विभागातील पोलीसांच्या बदल्या शिवसेनेच्या गोटातून झाल्याचा आरोप सीबीआयने केला होता. याच प्रकरणात तथ्य आढळ्यानंतर ईडीनेही याची चौकशी सुरू केली आहे. ईडीने दाखल केलेल्या चार्जशीटमध्ये अनिल परबांचे नाव होते. मात्र, अद्याप त्यांच्यावर गुन्हा दाखल झालेला नाही. यापूर्वी सचिन वाझे प्रकरणात अनिल परबांचे नाव उघडकीस आले होते. मुंबई महापालिकेतील भ्रष्टाचाराबद्दलही परबांवर आहे. कंत्राटदारांकडून वसुलीसाठी सचिन वाझेला परबांनी काम दिल्याची माहिती तपासात उघड झाली आहे.

या सर्वच प्रकरणात कुठले पुरावे आढळत आहेत का, अन्य कुठले धागेदोरे आढळतात का याबद्दलचा तपास आता ईडी घेत आहे. या प्रकरणी प्रार्थमिक तक्रार ईडी नोंदविणार आहे. त्यानुसार आता ही कारवाई सुरू असल्याचे समजते. अनिल परब हे उद्धव ठाकरेंचे अत्यंत जवळचे सहकारी मानले जातात. भाजप नेते किरीट सोमय्या यांनीही अनिल परबांच्या दापोलीतील रिसॉर्टबद्दल केंद्रीय पर्यावरण मंत्रालयाकडे तक्रार केली होती. बेकायदा रिसॉर्ट प्रकरणात त्यांच्यावर कारवाई होणार असल्याचा दावा सोमय्यांनी केला होता.

काही दिवसांपूर्वी परबांशी नजीक असलेल्या काही व्यक्तींवर आयकरने कारवाई केली होती. त्यात छापेमारीत अनेक पुरावे उघड झाल्याचे बोलले जात आहे. परबांचे शासकीय निवासस्थान शिवालयसह अन्य सात ठिकाणी मनी लाँड्रींग प्रकरणी ईडीने छापे टाकले आहेत. सकाळी ६.३० वाजता शिवालयवर ईडीचे पथक पोहोचले होते. अद्याप या प्रकरणात ईडीतर्फे कुठल्याही प्रकारची माहिती याबद्दल दिलेली नाही.