'या' दोन शिवसैनिकांविरोधात विनयभंगाचा गुन्हा दाखल

 

 

 

रायगड : महिलांचा कायम आदर करणाऱ्या शिवसेनेच्या काही शिवसैनिकांविरोधात रायगडच्या खारघर पोलीस ठाण्यात सोमवार, दि. ७ फेब्रुवारी रोजी विनयभंगाचा गुन्हा दाखल करण्यात आला आहे. शिवसेनेचे माजी जिल्हाप्रमुख बबन पाटील आणि खारघरचे माजी शहरप्रमुख शंकर ठाकूर यांच्याविरोधात एका महिलेने मित्रासोबतचे असलेले फोटो सोशल मिडीयावर व्हायरल केल्याप्रकरणी तक्रार केली आहे.

  

 

पीडित महिला ही करंजाडे वडघर इथली रहिवाशी असून काही दिवसांपूर्वी तिने मित्रासोबत काढलेले सेल्फी फोटो बबन पाटील आणि शंकर ठाकूर यांनी व्हॉटसअप ग्रुपवर व्हायरल केले होते. यात त्यांनी शहर प्रमुखांचा प्रताप असे लिहीत फोटो व्हायरल केले असल्याचे पीडित महिलेने सांगितले. हा प्रकार समजल्यानंतर या घटनेचा जाब विचारण्यासाठी पीडित महिला शंकर ठाकूर यांच्या घरी गेल्या असता त्यांनी अर्वाच्य आणि अश्लिल भाषेत शिवीगाळ करून घरात धक्काबुक्की केल्याचा आरोप पीडित महिलेने केला आहे. तिच्यासोबत तसेच फोटो काढण्याची मागणी त्यांनी केल्याचेही महिलेने सांगितले. फोटोचे बॅनर बनवून खारघर शहरात लावण्याची धमकी सुध्दा दिल्याचे सांगितले जात आहे. त्यामुळे या प्रकरणी आपली बदनामी झाल्याचा आरोप पीडित महिलेने केला असून बबन पाटील आणि शंकर ठाकूर यांच्यावर खारघर पोलीस ठाण्यात गुन्हा दाखल करण्यात आला आहे.