जे योग्य वाटतं, त्यासाठी भूमिका घ्याच!

लेखिका शेफाली वैद्य यांचे आवाहन

    04-Dec-2022
Total Views | 120
 
शेफाली वैद्य
 
 
 
 
मुंबई : ’‘समाजमाध्यमांमुळे पत्रकारिता क्षेत्रातील काही माध्यमांची मक्तेदारी संपुष्टात आली आहे. बातमी कुठली द्यायची आणि कशाप्रकारे द्यायची, हा ‘नॅरेटिव्ह’ ‘सेट’ करण्याचा या माध्यमांचा प्रयत्न समाजमाध्यमाने उघडा पाडला आहे. तुम्ही कुणाच्या बाबतीत बोलला नाहीत, तर मग तुमच्या बाबतीत कोण बोलणार? त्यामुळे आपल्याला जे वाटतं त्यासाठी भूमिका घेतलीच पाहिजे,” असे आवाहन लेखिका शेफाली वैद्य यांनी उपस्थितांना केले. ‘लोकमान्य सेवा संघा’च्या शताब्दी वर्षाच्या निमित्ताने विलेपार्ले येथील ‘लोकमान्य सेवा संघ’ येथे शनिवार, दि. 3 डिसेंबर रोजी आयोजित कार्यक्रमात ’अंतरंग समाजमाध्यमांचे’ या विषयावर शेफाली वैद्य यांनी उपस्थितांशी संवाद साधला. यावेळी ‘लोकमान्य सेवा संघा’च्या पदाधिकार्‍यांसह प्रेक्षकांचीही मोठी उपस्थिती होती.
 
 
यावेळी बोलताना शेफाली वैद्य पुढे म्हणाल्या की, ‘’मुळात केवळ मुख्य प्रवाहातील माध्यमे उपलब्ध असतानाचा संवाद एकेरी होता. परंतु, समाजमाध्यमांमुळे तुमचा वाचक किंवा प्रेक्षक हा थेट तुमच्याशी संवाद साधू लागला आहे. एखाद्या माध्यमाने किंवा वाहिनीने चुकीची बातमी दिली, तर त्याला खोडून काढण्यासाठी समाजमाध्यम हा एक मोठा पर्याय उपलब्ध झाला आहे.”
 
 
आजच्या एकांगी पत्रकारितेवर टीका करताना वैद्य म्हणाल्या की, ‘’काही माध्यमे आणि त्यातील कथित पत्रकार उगाच नको तिथे लक्ष ठेवून ‘हेडलाईन्स’ देण्याचा प्रयत्न करतात. बातमीदारीची तत्वे बाजूला सारून, अर्धसत्य सांगून आणि जाणीवपूर्वक चुकीचा ‘नॅरेटिव्ह’ ‘सेट’ करण्यासाठी हे प्रकार केले जातात. त्यामुळे आपल्याला जे वाटतं आणि जे सत्य आहे, ते उघडपणे मांडणे आणि त्यासाठी ठाम भूमिका घेणे अत्यंत गरजेचे आहे,” असे शेफाली वैद्य यांनी म्हटले आहे.
 
 
यावेळी शेफाली वैद्य यांनी आपल्या एका पुस्तकातील परिच्छेदाचेही वाचन केले. त्यात त्यांनी मुंबईतील गर्दीत पहिल्यांदा केलेला प्रवास, अनोळखी महिलेने त्यांच्याशी केलेले कथन अशा काही आठवणींचा समावेश होता. तसेच, अनेकांच्या आयुष्याशी निगडित असलेला ’सांगण्यासारखं प्रत्येकाच्या आयुष्यात काही ना काही असतं, पण ते ऐकून घेणारं कुणी मिळालंच नाही तर?’ हा सवालही त्यांनी आपल्या पुस्तकाच्या परिच्छेदाच्या अनुषंगाने उपस्थित केला.
 
दीपक करंजीकरांचे खुमासदार भाषण आणि पुस्तक परिचय
 
शेफाली वैद्य यांनी लिहिलेल्या ’चितरंगी रे’ आणि ’नित्य नूतन हिंडावे’ या दोन पुस्तकांविषयी प्रसिद्ध अभिनेते, लेखक दीपक करंजीकर यांनी प्रकाश टाकला. आपल्या खुमासदार शैलीत आणि ओघवत्या शब्दांतून करंजीकरांनी वाचकांमध्ये शेफाली वैद्य यांच्या पुस्तकाविषयी असलेली उत्सुकता भरीस टाकण्याचे काम केले. अत्यंत सुंदर आणि स्पर्शून टाकणार्‍या शब्दांमधून दीपक करंजीकर यांनी शेफाली वैद्य यांच्या दोन्ही पुस्तकांचे सार सांगितले. तसेच, त्यासाठी शेफाली वैद्य यांच्या व्यक्तिमत्त्वाचा परिचय करून दिला. त्यांच्या भाषणामुळे कार्यक्रमाला आणखीनच रंगत आली होती.
 
 
अग्रलेख
जरुर वाचा
आंतरराष्ट्रीय शिष्टमंडळाचे चित्रनगरीत पारंपरिक पध्दतीने स्वागत

आंतरराष्ट्रीय शिष्टमंडळाचे चित्रनगरीत पारंपरिक पध्दतीने स्वागत

जागतिक स्तरावरील सर्जनशील आशयनिर्माते, मनोरंजन विश्वातील नामांकित उद्योग कंपन्या, व्हीएफएक्सपासून गेमिंगपर्यंत विविध क्षेत्रातील अद्ययावत तंत्रज्ञान हे सगळे एका छताखाली आणणारी मुंबईतील वेव्हज शिखर परिषद यशस्वीपणे संपन्न झाली. १ ते ४ मे दरम्यान आयोजित करण्यात आलेल्या या परिषदेच्या निमित्ताने मुंबई भेटीवर असलेल्या विविध देशातील शिष्टमंडळाचे गोरेगाव येथील दादासाहेब फाळके चित्रनगरीत पारंपरिक पध्दतीने स्वागत करण्यात आले. चित्रनगरीत सुरू असलेले चित्रीकरण, विविध सेट्स यांना भेट देत त्यांनी चित्रिकरणाविषयी सविस्तर..

Email

admin@mahamtb.com

Phone

+91 22 2416 3121