‘उर्दू भाषा केंद्रा’साठी शिवसेनेचे लांगूलचालन

’भायखळ्यातील आग्रीपाडा परिसरातील या भूखंडावर औद्योगिक प्रशिक्षण केंद्रासाठी राखीव भूखंड असा फलक होता, जो रातोरात इथून हटविण्यात आला आहे. या भूखंडावर कशाचे बांधकाम केले जात आहे, काय घडामोडी घडवल्या जात आहेत, याबाबत स्थानिक नागरिक अनभिज्ञ आहेत. औद्योगिक प्रशिक्षण केंद्रासाठी राखीव ठेवण्यात आलेला भूखंड अचानक उर्दू भवनासाठी का देण्यात आला? या कृतीच्या आडून काही विशिष्ट समाजाला खूश करण्याचे तर प्रयत्न केले जात नाहीत ना? याचे उत्तर सत्ताधारी शिवसेना आणि पालिका प्रशासनाने द्यावे. या मैदानावर प्रस्तावित असलेल्या या उर्दू भवनाच्या उभारणीला स्थानिकांचा तीव्र विरोध असून कुठल्याही विशिष्ट वर्ग किंवा समुदायाला गोंजारण्यासाठी जर हे प्रयत्न केले जात असतील तर ते नक्कीच अयोग्य आहे. मुळात हा परिसर मराठीबहुल लोकवस्तीचा असतानाही या परिसरात ‘उर्दू भवन’ उभारणी करण्याचा घाट कशासाठी घातला जात आहे, असा सवाल स्थानिक नागरिकांनी दै.‘मुंबई तरुण भारत’शी बोलताना उपस्थित केला आहे.