मुंबईतील पूलबांधणी प्रकल्पांचा आढावा

गोवंडी-मानखुर्द व जुईनगर-तुर्भे रेल्वे स्थानकाजवळच्या दोन पुलांची रुंदी (चार पदरीवरून आठ पदरी) वाढविण्याचे काम रखडले आहे. काम पूर्ण होण्याची अंतिम मुदत डिसेंबर २०२० होती. पण, कोरोना टाळेबंदीमुळे मनुष्यबळ कमी पडल्यामुळे काम बंद पडले. काम पूर्ण होण्यासाठी आणखी काही महिन्यांचा अवधी लागणार आहे. या पुलांचा खर्च अनुक्रमे ३०.४४ कोटी व ६३.८४ कोटी राहणार आहे.मुलुंडकरांसाठी तिसरा उड्डाणपूल - मुलुंड स्थानकाच्या दोन्ही टोकांना दोन उड्डाणपूल आहेत. आता मध्यभागी तिसरा उड्डाणपूल होणार आहे. येथे प्रस्तावित भुयारी मार्ग तयार होणार होता, पण तो रद्द झाला आहे. या बदलीच्या प्रस्तावामुळे नागरिक व वाहनचालक दोघांनाही फायदा मिळेल. त्याजागी रेल-ओव्हर ब्रिज होणार आहे. कारण, भुयारी मार्गात पाणी तुंबते. या तिसर्‍या पुलाला तांत्रिक सल्लागार समितीने मंजुरी दिली आहे.दादर येथील लोकमान्य टिळक पुलासह दक्षिण मुंबईतील चार पूल केबलवर उभारून बांधण्याची शक्यता वर्तविली जात आहे. १४ धोकादायक पूल म्हणून जाहीर केलेल्यांपैकी चार पूल पाडून झाल्यावर केबल आधारित ते करावे असे ठरु शकते. सँडहर्स्ट रोडवरील हँकॉक पूल गेले सहा वर्षे रखडला आहे. रे रोड रेल्वेमार्ग, लोकमान्य टिळक पूल व भायखळा येथील सीताराम सेल्वन व्हाया ब्रिज अशा तीन नवीन पुलांसाठी साधारणपणे अनुक्रमे १४७ कोटी, ३७५ कोटी व २०० कोटी (एकूण ७२२ कोटी) खर्च येणार आहे. घाटकोपर येथील रेल्वेमार्गावरील कामही याच पद्धतीने केले जाणार आहे.

कुर्ला पश्चिमेकडील मिठी नदीवरील काम अद्याप रखडलेले आहे. कंत्राटदारावर कोणतीही कारवाई न करता हे काम ‘एमएमआरडीए’कडे सोपविण्याचे पालिकेच्या विचाराधीन आहे. आधी साडेतेरा कोटी दिल्यानंतर आणखी ५१ कोटी पालिका ‘एमएमआरडीए’ला देणार आहे. हे काम आणखी रखडण्याचीच शक्यता आहे.