'वांद्रे वंडरलँड' कार्यक्रमाला अखेर स्थिगिती

 

 

 

 

 

 

वांद्रे येथे आयोजित करण्यात आलेल्या या कार्यक्रमावरून विविध राजकीय पक्षांनी घेतलेलया आक्षेपांमुळे मोठा वादंग निर्माण झाला होता. बुधवार, दि. २९ डिसेंबर रोजी मुंबईत सुमारे २५०० नव्या कोरोनाबाधितांची नोंद झाल्यानंतर प्रशासन खडबडून जागे झाले आहे. त्यातच वांद्रे वंडरलँड प्रकरणामुळे सुरु असलेल्या आरोप प्रत्यारोपांची आणि शहरातील रुग्णसंख्येची दखल घेत रविवार, दि. २ जानेवारी २०२२ पर्यंत हा महोत्सव नागरिकांसाठी बंद करण्यात आला आहे.

 

 

मुंबईतील वाढत्या ओमायक्रॉन बाधितांच्या संख्येचा अंदाज घेत पालिका प्रशासन आणि मुंबई पोलिसांतर्फे शहरात ख्रिसमस आणि नववर्ष साजरे करण्यावर विविध निर्बंध लावले होते. ख्रिसमस आणि नववर्षाची आयोजित करण्यात येणाऱ्या पार्ट्या आणि त्यातील माणसांच्या संख्येवरही मोठ्या प्रमाणात निर्बंध लावण्यात आले होते. तथापि, मुंबईत अनेक ठिकाणी विशेषकरून मोठ्या बॉलिवूड सेलिब्रिटीजतर्फे उंची पंचतारांकित हॉटेलांमध्ये पार्ट्या आयोजित करण्यात आल्याचे निष्पन्न झाले होते. त्यावरून अनेक इमारतीही सील करण्यात आल्या होत्या. शहरात निर्बंध लावलेले असताना देखील मुख्यमंत्र्यांचे होम ग्राउंड असलेल्या वांद्रे मतदारसंघात असे आयोजन केले जात असेल तर ही बाब नक्कीच दुर्लक्षित करण्यासारखी नाही. त्यामुळे अशा प्रकारचे आयोजन करणाऱ्यांवर कारवाई करण्यात यावी, अशी मागणी आता विविध सामाजिक संस्था आणि राजकीय मंडळींकडून केली जात आहे.