२०२१ आणि शेअर बाजाराची कामगिरी

 

 

स्टेट बँकेच्या शेअरच्या बाजारीमूल्यात २०२१ मध्ये ७० टक्के वाढ झाली. ‘इंडियन ओव्हरसिज बँके’च्या शेअरच्या बाजारीमूल्यात ९३ टक्के वाढ झाली. सार्वजनिक क्षेत्रातील इतर बँकांच्या शेअर्सनीही चांगली कामगिरी केली. ‘न्यू जनरेशन’ खासगी क्षेत्रातील ‘आयसीआयसीआय’ बँकेच्या शेअर मात्र मागणी कमी होती. या बँकेच्या शेअरच्या बाजारीमूल्यात फक्त ३६ टक्के वाढ झाली. ‘एचडीएफसी’ बँक, ‘कोटक महिंद्रा’ बँक यांच्या भागधारकांना २०२१ मध्ये चांगला परतावा मिळू शकला नाही. या अगोदरच्या वर्षी या बँकांची कामगिरी चांगली होती.

 

 

 

‘निफ्टी’ सार्वजनिक उद्योगातील बँका (पीएसयू) ‘बँक इंडेक्स’मध्ये १२ सार्वजनिक क्षेत्रातील बँका व जम्मू आणि काश्मीर बँक ’लिस्ट’आहे. २०२१ मध्ये या ‘इंडेक्स’ने ४७ टक्के परतावा दिला किंवा बँकांशिवाय बांधकाम उद्योगातील कंपन्यांची कामगिरीही शेअर बाजारात चांगली होती. ‘निफ्टी रिअ‍ॅल्टी इंडेक्स’ने गुंतवणूकदारांना ५२ टक्के परतावा दिला. ‘निफ्टी मेटल इंडेक्स’ने आजपर्यंत गुंतवणूकदारांना ६८ टक्के परतावा दिला आहे. ‘जास्त जोखीम, जास्त परतावा’ हे जरी शेअर बाजाराचे ब्रीदवाक्य असले, तरी ते नेहमीच यशस्वी होईल, असेही नाही. जास्त जोखमीने नुकसान झाल्याची उदाहरणेही भरपूर आहेत. किरकोळ गुंतवणूकदारांची अशी मनोवृत्ती असते की, ते सुरुवातीला गुंतवणूक करण्याचे धाडस करीत नाहीत, सुरुवातीस गुंतवणूक करण्यास कचरतात. पण, शेअर जर वर जातो आहे असेे दिसले की, ते गुंतवणूक करतात. एका अर्थी अशी सावधानता बाळगणे बरोबर आहे.