सोयर-सुतक तरी पाळा रे !

लॉकडाऊनमुळे कोट्यवधींचा महसुल बुडाला राज्याची तिजोरी रिकामी झाली. राज्य सरकारी कर्मचाऱ्यांचे वेतन देण्यासाठीही पैसे आमच्याकडे नाहीत, असे विधान खुद्द मदत व पूर्नवसन मंत्री विजय वडेट्टीवार यांनी दोनच दिवसांपूर्वी केले. याच दोन दिवसांत राज्याच्या शालेय शिक्षणमंत्री वर्षा गायकवाड यांच्यासह चार मंत्र्यांसाठी १.३७ कोटी रुपयांच्या वाहन खरेदीला मंजूरी देण्यात आली. सोशल मीडियावर अत्यंत साधेपणाचा आव आणणाऱ्या या मंत्र्यांनी नव्या कोऱ्या वाहनांसाठी २२ लाख ८६ हजार ८६ रुपये किमतीच्या सहा गाड्या विकत घेतल्या. मंत्री गायकवाड यांच्यासह राज्यमंत्री व शेतकऱ्यांसाठी कायम आवाज उठवणारे बच्चू कडू, क्रीडामंत्री सुनील केदार, आदिती तटकरे आणि शालेय शिक्षणाचे अतिरिक्त मुख्य सचिवांना या सरकारच्या विशेष वाहन योजनेचा लाभ मिळणार आहे. 

सरकार नव्हे तर 'कार' चालवण्यासाठी गेल्या काही दिवसांत प्रसिद्ध असलेले मुख्यमंत्री उद्धव ठाकरे यांच्या सरकारने शनिवारी एक निर्णय घेतला. मुंबईतील एका खासगी एजन्सीकडून वाहन खरेदीला मान्यता देणारा जीआर शनिवारी निघाला, शालेय शिक्षण विभागाकडूनही एक जीआर काढण्यात आला. त्यानुसार वर्षा गायकवाड यांच्यासाठी इनोव्हा क्रिस्टा मॉडेलची कार खरेदी करण्यात आली आहे. सध्याच्या गरजेनुसार कामकाजासाठी हा निर्णय घेण्यात आल्याचे सरकारने स्पष्टीकरणही दिले आहे. पण मग सरकारने तिजोरीत खडखडाचे कारण देऊन शासकीय कर्मचाऱ्यांचे पगार कपात का केली. राज्य संकटात असताना नव्या कोऱ्या गाड्या खरेदी करण्याचा घाट का ? आजपर्यंत कोरोनामुळे मृत झालेल्या ८ हजार ३७६ जणांच्या घरात अजूनही सुतक आहे. तिथल्या अनेकांची कोरोनाशी झुंज सुरू आहे, त्यांनी ही माहिती वाचल्यावर त्यांच्या मनावर होणारा आघात समजून घेण्याइतपत सरकार संवेदनशील आहे का ?