प्रेक्षकांच्या लाडक्या ‘श्रीयुत गंगाधर टिपरें’चे छोट्यापडद्यावर पुनरागमन!

मुंबई : प्रेक्षकांच्या नजरा खिळवून ठेवणारी ‘श्रीयुत गंगाधर टिपरे’ ही मालिका आजही सगळ्यांच्या स्मरणात आहे. एक आदर्श एकत्र कुटुंब नेमकं कसे असावे हे या मालिकेतून उत्तमरित्या मांडण्यात आले. या मालिकेतील प्रत्येक कलाकारांनी आपल्या अभिनयातून प्रेक्षकांची मने जिंकली. कुटुंबावर आधारित या मालिकेमध्ये दिलीप प्रभावळकर यांनी गंगाधर टिपरे यांची भूमिका साकारली होती. तर अभिनेता राजन भिसे आणि अभिनेत्री शुभांगी गोखले हे त्यांच्या मुलगा आणि सुनेच्या भूमिकेत दिसले होते. तर विकास कदमने (शिऱ्या) त्यांच्या नातवाची तर, रेश्मा नाईकने(शलाका) नातीची भूमिका साकारली होती.

एकंदरीतच हे कुटुंब आपल्या आसपासचे वाटावे इतके खरे, मनाला भावणारे. आपले विश्व विसरायला लावून आपण अगदी त्यांच्यात सामावून जातो इतके अप्रतिम कलाकृती. दिलीप प्रभावळकरांच्या अनुदिनी या संग्रहावर तयार केलेली ही मालिका अजरामर ठरली. लॉकडाऊनमध्ये प्रेक्षकांच्या टेन्शनची मात्रा कमी करण्यासाठी हि मालिका झी मराठीवर पुन्हा एकदा प्रेक्षकांच्या भेटीस येणार आहे. विनोद हे किती सहज असतात, हे या मालिकेतून समजते आणि आता त्याच विनोदांनी प्रेक्षकांच्या चेहऱ्यावर पुन्हा एकदा हसू उमटणार आहे. श्रीयुत गंगाधर टिपरे ही मालिका झी मराठी वाहिनीवर १५ जूनपासून संध्याकाळी ७.३० वाजता प्रेक्षकांच्या भेटीस येणार आहे.