समृद्ध आंग्रिया प्रवाळ बेट संरक्षित होणार; 'मॅंग्रोव्ह सेल'कडून प्रस्ताव; पहा व्हिडीओ

 छायाचित्र सौजन्य - डब्लूसीएस

 

 

 

 

मुंबई (अक्षय मांडवकर) - कोकण किनारपट्टीपासून १०५ किमी दूर समुद्रात असलेल्या समृद्ध आंग्रिया प्रवाळ बेटाला 'सागरी क्षेत्र कायदा, १९७६'अंतर्गत संरक्षण देण्याचा प्रस्ताव वन विभागाने राज्य सरकारला पाठवला आहे. राज्य सरकाराने या प्रस्तावाचे अवलोकन करुन त्याला मंजुरी दिल्यानंतर हा प्रस्ताव 'केंद्रीय पर्यावरण मंत्रालया'ला पाठविण्यात येईल. वन विभागाच्या 'कांदळवन कक्षा'ने (मॅंग्रोव्ह सेल) आंग्रिया बेटावरील समृद्ध सागरी जैवविविधता संरक्षित करण्यासाठी या बेटाला संरक्षण देण्याचा प्रस्ताव तयार केला आहे.

 

 

 

 

महाराष्ट्राच्या सागरी परिक्षेत्राची सीमा १२ सागरी मैल अंतरापर्यंत आहे. १२ ते २०० सागरी मैलपर्यंतचे क्षेत्र केंद्र सरकारच्या अखत्यारित येते. त्याला 'विशेष आर्थिक क्षेत्र' (exclusive economic zone) म्हटले जाते. हे संपूर्ण क्षेत्र 'केंद्रीय विदेश मंत्रालया'च्या अधिकाराअंतर्गत येते. सागरी जैवविविधता संवर्धनाच्या अनुषंगाने महाराष्ट्रात केवळ दोन क्षेत्रांना संरक्षित दर्जा देण्यात आला आहे. यामध्ये 'मालवण सागरी अभयारण्य' आणि 'ठाणे खाडी फ्लेमिंगो अभयारण्या'चा समावेश होतो. छत्रपती शिवाजी महाराजांच्या सैन्यातील आरमाराचे प्रमुख कान्होजी आंग्रे यांच्या नावाने प्रसिद्ध असलेले आंग्रिया प्रवाळ बेट कोकण किनारपट्टीपासून ५६.७ सागरी मैल दूर आहे. या बेटाच्या भौगोलिक परिस्थितीमुळे सर्वसामान्य नागरिकांना त्याठिकाणी जाता येत नाही. मात्र, या बेटावरील सागरी जैवविविधता लक्षात घेता तिच्या संवर्धनाचे प्रयत्न होणे आवश्यक आहेत. यासाठी वन विभागाच्या 'कांदळवन कक्षा'ने या बेटाला 'सागरी क्षेत्र कायद्या'अंतर्गत 'विशेष आर्थिक क्षेत्रा'मध्ये संरक्षित करण्याचा प्रस्ताव तयार केला आहे.