सीएएविरोधात हैदराबाद विद्यापीठात ‘शाहीन बाग नाईट’चे आयोजन

हैदराबाद : नागरिकत्व सुधारणा कायद्याविरोधात आंदोलन करण्यासाठी हैदराबाद विद्यापीठात विद्यार्थी संघटनेने ‘शाहीन बाग नाईट’ नामक कार्यक्रमाचे आयोजन केले होते. मात्र विद्यापीठाने नियम भंग केल्याप्रकरणी या विद्यार्थ्यांना दंड ठोठावला आहे. या विद्यार्थ्यांनी नागरिकत्व सुधारणा कायद्याविरोधोत विद्यापीठाच्या आवारात रात्री ९.०० वाजल्यानंतर 'शाहीन बाग नाईट'चे आयोजन केले होते. यामुळे हैदराबाद विद्यापीठाने आंदोलन करणाऱ्या विद्यार्थ्यांना प्रत्येकी ५ हजार रुपयांचा दंड ठोठावला आहे.

'नॉर्थ शॉपिंग कॉम्प्लेक्समध्ये ३१ जानेवारी रोजी रात्री ९.०० वाजल्यानंतर विद्यार्थ्यांनी एक कार्यक्रम आयोजित केला. यावेळी, कॅम्पसच्या भिंती खराब केल्या गेल्या. अशा पद्धातीच्या आयोजनांमध्ये सहभाग विद्यार्थ्यांच्या अकॅडमिक करिअरवर हानिकारक प्रभाव पाडू शकतो,’ असे विद्यापीठाकडून आलेल्या आदेशात म्हंटले आहे. यानंतर विद्यार्थ्यांना चेतावणी देत भविष्यात आपल्या अभ्यासावर लक्ष केंद्रीय करण्याच्या सूचना देण्यात आल्या.

विद्यार्थी संघटनेने मात्र याचा निषेध करत विद्यापीठाने सुनावलेली शिक्षा कोणत्याही अटींशिवाय मागे घ्यावी, अशी मागणी केली आहे. विद्यापीठाच्या प्रवक्त्यांच्या म्हणण्यानुसार, नियमाप्रमाणे कॅम्पसमध्ये रात्री ९.०० वाजल्यानंतर सार्वजनिक ठिकाणी कोणत्याही प्रकारच्या बैठका किंवा आंदोलन करण्याची परवानगी नाही. या विद्यार्थ्यांनी या नियमांचे पालन न करता आपला कार्यक्रम रात्री ९.०० वाजल्यानंतर सुरू केला जो रात्री २.३० वाजेपर्यंत सुरू होता. त्यामुळे या कार्यक्रमाच्या आयोजक विद्यार्थ्यांवर दंडात्मक कारवाई करण्यात आली. परंतु, हा दंड भरण्यासाठी विद्यार्थ्यांना वेळेची कोणतीही सीमा देण्यात आलेली नाही.