घटलेली टक्केवारी चिंता वाढवणारी!

    22-Oct-2019   
Total Views |





डोंबिवली
: डोंबिवली शहर सुशिक्षित शहर म्हणून ओळखले जाते, परंतु कोणतीही निवडणूक असो, मतदानाची टक्केवारी ५० टक्क्यांच्या आत राहिली आहे. २०१४ च्या निवडणुकीत ४४.७२ टक्के इतके मतदान झाले होते. २००९ च्या मानाने २०१४ मधील मतदानात १ टक्क्याने वाढ झाली, तरीही यंदा मतदान ४०.७२ टक्के झाले आहे. त्यामुळे ४ टक्क्यांनी घटलेली टक्केवारी उमेदवारांसाठी चिंतेची ठरली आहे.



मतदानाच्या आकडेवारीत वाढ व्हावी म्हणून निवडणूक आयोगाने यंदा आपली केंद्रे तळमजल्यावर हलवली होती
. अनेक प्रकारची अभियान राबविण्यात आली होती. यंदा विधानसभा मतदार संघात ३ लाख, ५१ हजार, ५२६ मतदारांची नोंद करण्यात आली होती. २०१४ च्या मतदारसंख्येत ९ हजार मतदारांची वाढ झाली होती. यात नवीन मतदारांचा कौल तितकाच महत्त्वाचा ठरणारा आहे. मात्र, लोकसभा निवडणुकीत झालेला घोळ यंदाही कायम राहिल्याने मतदारांनी निरुत्साह दाखवत मतदानाकडे पाठ फिरवली. याचबरोबर निकृष्ट रस्ते, उड्डाणपुलांची कामे, वाहतूककोंडी, फेरीवाल्यांचा प्रश्न, मनोरंजनांच्या साधनांचा अभाव असल्यानेदेखील मतदारराजाने मतदान न करता आपली नाराजी व्यक्त केली आहे.



विधानसभा निवडणुकीसाठी यंदा वेळेअभावी उमेदवारांना काही भागात पोहोचणे शक्य झालेले नाही
, याबाबतसुद्धा मतदारांनी रोष व्यक्त केला. डोंबिवली शहराने आतापर्यंत राज्यमंत्री रवींद्र चव्हाण यांच्या बाजूने आपला कौल दिला आहे. मात्र, या शहरातील तरुणाईला राज ठाकरे यांच्याबद्दल ओढ असल्याने याची परिणती मतदानातून स्पष्ट होईल. राज ठाकरे यांच्या सुरुवातीच्या बहुतांश आंदोलनात डोंबिवलीकर तरुणांचा सहभाग होता. मात्र, जुन्याजाणत्या लोकांचे अद्याप सेना-भाजप महायुतीकडे झुकते माप राहिले आहे. सोमवारी झालेल्या मतदानात १ लाख, ०५ हजार,२१६ पुरुष मतदारांनी तर ७७ हजार,१७३ स्त्री मतदारांनी म्हणजे एकूण १ लाख, ८२ हजार, ३८९ मतदारांनी आपला मतदानाचा हक्क बजावला. दरम्यान, १ लाख, ३३ हजार,१३७ मतदारांनी मतदानाकडे पाठ फिरवली आहे.



विकासकामांच्या अभावामुळे फिरवली पाठ


‘‘डोंबिवलीकडे सुसंस्कृत शहर म्हणून पाहिले जाते. या शहरात अनेक नागरी समस्यांनी उग्र रूप धारण केले आगे. वाहतूककोंडी, चांगले रस्ते नाही, पाण्याची बोंबाबोंब, प्रदूषण या सगळ्याला डोंबिवलीकर रोज सामोरे जात आहेत. विकास होत नसले तर मतदान का करायचे व कोणासाठी करायचे, असा काहीसा सूर मतदारांमध्ये होता व त्याचेच प्रतिबिंब मतदानातून उमटले आहे,” असे ज्येष्ठ पत्रकार विजय राऊत यांनी सांगितले.


रोशनी खोत

सध्या दै. मुंबई तरुण भारतसाठी कल्याण-डोंबिवली वार्ताहर म्हणून कार्यरत. वाणिज्य शाखेतून पदवीपर्यंतचे शिक्षण. त्यानंतर पत्रकारितेचे शिक्षण घेतले. वाचनाची, लिखाणाची तसेच नृत्याची आवड. कथ्थक नृत्यशैलीचेही शिक्षण घेत आहे.