सूनबाई...

येत्या 7 तारखेला म्हणजे मंगळवारी राज्यात लोकसभेच्या तिसर्‍या टप्प्यातील मतदान प्रक्रिया संपन्न होईल. यात बहुतांशी लढती या लक्षवेधक आहेत. अर्थात, पश्चिम महाराष्ट्रातील या लढतींकडे ज्या मतदारसंघात अशी लक्षवेधक लढत होते, त्यातील बारामती मतदारसंघाकडे संपूर्ण देशाचे लक्ष लागले आहे. त्याला कारणेदेखील अनेक आहेत आणि ती लढतदेखील अनेकार्थांनी यावेळी अतिशय महत्त्वाची होऊन बसली आहे. जवळपास 1984 पासून या मतदारसंघावर शरद पवार घराण्याचे एकहाती साम्राज्य. देशात एकेकाळी प्रगल्भ राजकारणी म्हणून ज्यांच्याकडे बघितले जात असे, असे शरद पवार यांच्या परिवारातील व्यक्तींनी 1985 आणि 1989च्या पोटनिवडणुका सोडल्या, तर या मतदारसंघावरील ताबा काही सोडला नाही. केवळ आपल्या घरातील व्यक्ती राजकारणात असावी, या एकमेव महत्त्वाकांक्षेसाठी पवारांनी काँग्रेससारख्या त्या काळातील बलाढ्य पक्षासह त्यांना महत्त्वाच्या वेळी साथ देणार्‍या पक्षाची देखील डाळ शिजू दिली नाही. त्यामुळे स्वार्थी राजकारण होत असल्याचे बघून देखील, त्यांचे मित्रपक्ष मूग गिळून बसण्याशिवाय काहीच करू शकत नव्हते, ही वस्तुस्थिती कोणीही नाकारणार नाही. एवढेच कशाला अनेकवेळा दगा होऊन देखील पवारांविरोधात काँग्रेसची सक्षम उमेदवार उभा करण्याची हिंमत झाली नाही, यातच या पक्षाची हताशा आणि अपरिहार्यता लक्षात येते. तथापि शरद पवारांनी हा मतदारसंघ आपल्याकडे ठेवताना जे राजकारण केले, त्यामुळे राजकारणातील विश्वासघात आणि अस्थिरता या गोष्टींवरच अधिक भर दिल्याचे आढळून येते. त्यांचे राजकारण हे ना धड स्वतः पूर्णकाळ सत्तेत टिकून राहण्याचे होतेे आणि अन्य कुणाला देखील सत्तेत टिकू द्यायचे नाही, अशा थाटाचे असायचे. लोकसभेसाठी या मतदारसंघात अजित पवारांना केवळ एकदा संधी मिळाली. तथापि, 1984 पासून 2019 पर्यंत शरद पवार आणि सुप्रिया सुळे हेच उमेदवार या मतदारसंघातून निवडून आले. आता या मतदारसंघाच्या इतिहासात प्रथमच ‘पवार विरूद्ध पवार’ असा सामना रंगला आहे. या मतदारसंघात आता शरद पवारांना स्वतःकडे ही जागा अबाधित ठेवणे अवघड होऊन बसले आहे. कारण, खुद्द घरातीलच सुनेने त्यांच्यासमोर उभे केलेले आव्हान!