प्रिया बापटचे हिंदी वेबसिरीजमध्ये पदार्पण
महा एमटीबी   08-Apr-2019



मुंबई : प्रिया बापट लवकरच नागेश कुकुनूर दिग्दर्शित 'सिटी ऑफ ड्रीम्स' या हिंदी वेबसिरीजमध्ये झळकणार आहे. राजकारणावर भाष्य करणाऱ्या आणि प्रियाच्या अवतीभवती फिरणाऱ्या या वेबसिरीज मध्ये तिच्या व्यक्तिरेखेचे विविध पैलू उलगडणार आहेत.

 

प्रिया बापट मराठी चित्रपटसृष्टीतील एक नावाजलेले नाव असून तिने उत्कृष्ट कलाकृतींमध्ये आपल्या सहजसुंदर अभिनयाने 'चारचाँद' लावले आहेत. 'काकस्पर्श', 'टाईमपास-२', 'टाईम प्लीज', 'मी शिवाजी राजे भोसले बोलतोय', 'वजनदार' या मराठी चित्रपटांबरोबरच 'मुन्नाभाई एम.बी.बी.एस., लगे रहो मुन्नाभाई सारख्या हिंदी चित्रपटातून प्रियाने आपले अभिनयकौशल्य दाखवले आहे.

 

हिंदी चित्रपटानंतर प्रिया आता हिंदी वेबसिरीजमध्ये दिसणार आहे. 'सिटी ऑफ ड्रीम्स'च्या माध्यमातून प्रिया डिजिटल प्लॅटफॉर्म सुद्धा गाजवणार यात शंका नाही. ॲप्लॉज एंटरटेनमेंटची निर्मिती आणि नागेश कुकुनूर यांचे दिग्दर्शन असणाऱ्या 'सिटी ऑफ ड्रीम्स' या वेबसिरीजमध्ये प्रिया दिसणार आहे. नागेश यांनी यापूर्वी बॉलिवूडला 'डोर', 'इक्बाल', 'धनक' यांसारख्या उत्तम कलाकृती दिल्या आहेत. लवकरच हॉटस्टारवर ही वेबसिरीज प्रदर्शित होणार आहे.

 

माहितीच्या महापुरात रोजच्या रोज नेमका मजकूर मिळविण्यासाठी लाईक करा... facebook.com/MahaMTB/ आणि फॉलो करा twitter.com/MTarunBharat