सीमेवरील दहशतवाद रोखणार इलेक्ट्रोनिक भिंत
महा एमटीबी   14-Sep-2018

 

नवी दिल्ली : पाककडून खतपाणी घातल्या जाणाऱ्या दहशतवादाला रोखण्यासाठी सीमेवर आता अत्याधुनिक यंत्रणा बसवली जाणार आहे. केंद्रीय गृहराज्य मंत्री राजनाथ सिंह सोमवारी, दि. १७ सप्टेंबर रोजी जम्मू येथील प्रकल्पाचे उद्घाटन करणार आहेत. दहशतवाद्यांची घुसखोरी रोखण्यासाठी भारताने सीमेवर 'इलेक्ट्रॉनिक भिंत' उभी केली आहे. जम्मूतील आंतरराष्ट्रीय सीमेवर प्रथमच हायटेक सर्व्हीलन्स सिस्टिम उभारण्यात आली आहे. याच्या मदतीने जमीन, पाणी आणि हवेत एक अदृश्य इलेक्ट्रॉनिक बॅरियर उभरण्यात येणार आहे. यामुळे सीमा सुरक्षा दलाला (बीएसएफ) घुसखोरांना ओळखण्यास आणि कठीण ठिकाणांवरील घुसखोरी रोखण्यास मदत मिळणार आहे. एका प्रकल्पानुसार, जम्मूतील ५.५ किमी सीमेवर देखरेख ठेवता येऊ शकते. कॉम्प्रिहेन्सिव्ह इन्टीग्रेटेड बॉर्डर मॅनेजमेंट सिस्टिम (सीआयबीएमएस), से नाव देण्यात आलं आहे.

 

काय आहे सीआयबीएमएस यंत्रणापाकिस्तानच्या सीमेकडील ठिकाणांहून कायम रात्रीच्या वेळी दुर्गम भागातून भारतीय सीमेत घुसखोरी होते. अशा ठिकाणी सीआयबीएमएस यंत्रणा उभारून अनेक आधुनिक सर्व्हीलन्स तंत्रज्ञानाचा वापर करण्यात येणार आहे. यात थर्मल इमेजर, इन्फ्रारेड आणि लेझर बेस्ड इन्ट्रुडर अलार्म सुविधा असतील. यानुसार जमिनीवर अदृश्य कुंपण, हवाई टेहळणीसाठी विमान आणि जमिनीखाली सेन्सर लावलेले असतील.

 

भुयारांद्वारे येणाऱ्यांवरही नजर - दहशतवादी जमिनीखाली भुयार खोदून भारतीय सीमेत घुसखोरी करतात. पण आता दहशतवाद्यांना हे शक्य होणार नाही. भूयार रेडार आणि सोनार सिस्टिममुळे नदी पात्रालगतची सीमा सुरक्षित केली जाईल. सर्व माहिती रिअल टाइममध्ये म्हणजे प्रत्येक क्षणाची माहिती तात्काळ कळत जाईल. यामुळे सुरक्षा दलांना दहशतावाद्यांची घुसखोरी रोखता येँणार आहे.

 


सीमेवरील पहिलाच प्रयोग - इन्टीग्रेटेड बॉर्डर मॅनेजमेंट सिस्टिम (सीआयबीएमएस) वरील अदृश्य भिंत (व्हर्च्युअल फेन्स) हा भारताचा पहिलाच प्रयोग आहे. प्रत्यक्ष जाऊन नजर ठेवता येणार नाही अशा दुर्गम भागाच्या सुरक्षेसाठी ही यंत्रणा तयार केली गेली आहे. तंत्रज्ञानाच्या मदतीने सुरक्षा दलांची शक्ती वाढणार आहे. मनुष्यबळ, शस्त्रास्त्र आणि अत्याधुनिक सर्व्हीलन्स उपकरणांच्या मदतीने सीमेवरील सुरक्षा अभेद्य केली जाईल. घुसखोरीच्या घटनांचा आढावा घेतल्यानंतर दोन भाग यासाठी निवडण्यात आले आहेत. येत्या सोमवारी तिथे ही नवी सुरक्षा यंत्रणा कार्यान्वीत होईल. इन्फ्रारेड आणि लेझर बेस्ड इन्ट्रुजन डिटेक्टर्स हे जमीन आणि नदीलगतच्या परिसरावर अदृश्य भिंतीचे काम करेल. सोनार सिस्टिम नदीतून होणारी घुसखोरी रोखेल. अॅरोस्टेट टेक्नॉलॉजी हवेतून टेहळणी करेल. तर जमिनीखालील सेन्सर्स भुयारातून होणाऱ्या घुसखोरीवर सतत देखरेख ठेवतील.
 
 

      माहितीच्या महापुरात रोजच्या रोज नेमका मजकूर मिळविण्यासाठी लाईक करा... facebook.com/MahaMTB/