आंतरराष्ट्रीय स्पर्धांमध्ये महाराष्ट्राचे खेळाडू नेत्रदीपक कामगिरी करतील - राज्यपालांचा विश्वास

राज्य शासनाच्या वतीने देण्यात येणाऱ्या शिवछत्रपती क्रीडा पुरस्कार प्रदान सोहळ्यात राज्यपाल बोलत होते. कार्यक्रमास क्रीडामंत्री विनोद तावडे, महापौर विश्वनाथ महाडेश्वर, जलसंपदा राज्यमंत्री विजय शिवतारे, आमदार आशिष शेलार, प्रधान सचिव नंदकुमार, क्रीडा आयुक्त सुनिल केंद्रेकर आदी मान्यवर उपस्थित होते.

यावेळी राज्यपालांच्या हस्ते सन २०१४-१५, २०१५-१६, २०१६-१७  या तीन वर्षांचे शिवछत्रपती राज्य क्रीडा पुरस्कार प्रदान करण्यात आले. याप्रसंगी राज्यपाल चे. विद्यासागर राव म्हणाले की, आज भारत देश सुपर पॉवर म्हणून पुढे येत असून अशा वेळी भारतात उत्तमोत्तम खेळाडू तयार होणे आवश्यक आहे. आता भारत ‘स्पोर्टिंग नेशन’ म्हणून पुढे येणे आवश्यक आहे. महाराष्ट्र आज वेगवेगळ्या क्षेत्रात नेत्रदीपक प्रगती करीत आहे. आज महाराष्ट्रात दर्जेदार, उत्तम खेळाडू घडविण्यासाठी महाराष्ट्रात क्रीडा विद्यापीठ स्थापन करण्यासाठी राज्य शासनाने प्रयत्न करण्याची गरज असून ते स्थापन झाल्यास या विद्यापीठाच्या माध्यमातून महाराष्ट्रात चांगले खेळाडू घडतील, असा विश्वासही राज्यपालांनी यावेळी व्यक्त केला.