भुसावळ बाजारपेठ पोलीस ठाण्यासमोर लवकरच होणार रेल्वेचा चौथा बोगदा

भुसावळ, १५ ऑक्टोबर

भुसावळ शहरातील बाजारपेठ पोलीस ठाण्यासमोर रेल्वेचे तीन बोगदे असून, भविष्यातील शहर व वाहतूक नियोजनाचा विचार करता येथे अजून एक चौथा बोगदा बांधण्याचे प्रयत्न आ. संजय सावकारे यांनी सुरू केले आहेत. या अनुषंगाने सोमवारी त्यांच्या निवासस्थानी शहरातील विकासकामांबाबत महत्त्वाची बैठक झाली.

 

बैठकीत नगरपालिकेचे मुख्याधिकारी रोहिदास दोरकुडकर, रेल्वेचे वरिष्ठ अधिकारी एम.एस.तोमर, ‘तरुण भारत’चे भुसावळ विभागीय सल्लागार समकित सुराणा, न.पा.चे पंकज पन्हाळे उपस्थित होते.

शहरात विविधठकाणी विकासाच्या माध्यमातून होणार असलेल्या बदलांवर चर्चा करण्यात आली. १ ऑक्टोबर रोजी राज्याचे अर्थ तथा वनमंत्री सुधीर मुनगंटीवार यांचा जळगाव दौरा होता. या दौर्‍यात ‘तरूण भारत’ भुसावळ विभागीय नवीन कार्यालयाच्या उद्घाटनासाठी ना. सुधीर मुनगंटीवार आले असता, आमदार संजय सावकारे यांनी शहरातील विकासकामांबात ना. मुनगंटीवार यांना माहिती दिली. नगरविकास खात्याकडून या कामांना मंजुरी देण्याचे आश्‍वासन ना. मुनगंटीवार यांनी दिले होते. विभागात ‘अ’ वर्ग असलेल्या भुसावळ नगरपालिकेला यावल रोडवरील सेंट अलायसेस शाळेजवळची रेल्वेची दीड लाख स्क्वेअर फुट जागा नवीन इमारतीसाठी देण्यात येणार आहे. तसेच बाजूलाच रेल्वे जीआरपी पोलिस कर्मचार्‍यांची वसाहत बांधण्यात येणार आहे. बाजारपेठ पोलीस ठाण्यासमोर रेल्वेच्या चौथ्या बोगद्याच्या कामाला लवकरच सुरुवात होणार आहे. बोगद्याजवळील व्यावसायिकांची लवकरच बैठक घेण्यात येऊन त्यांना सहकार्याचे आवाहन केले जाणार आहे. या नवीन बोगद्यामुळे व्यावसायिकांची दुकाने तुटणार आहेत.