काँग्रेसचा नाठाळपणा : सावरकरांची 'वीर' पदवी पाठ्यपुस्तकातून हटवली

जयपूर : राजस्थानमध्ये काँग्रेसला सत्ता स्थापन करून अवघे ६ महिनेही झाले नसताना नव्या वादाला आमंत्रण दिले आहे. राजस्थानमध्ये सत्तेत असलेल्या काँग्रेसच्या अशोक गहलोत यांच्या सरकारने बारावीच्या पाठपुस्तकातुन सावरकरांच्या नावापुढील 'वीर' पदवी हटवली आहे. त्यांनी पाठ्यपुस्तकांमध्ये काही आक्षेपार्ह्य बदल केले आहेत. यामध्ये ऐतिहासिक घटना आणि व्यक्तींसंदर्भातील तपशीलाचा समावेश आहे. भाजपची सत्ता असताना पाठ्यपुस्तकात जाणीवपूर्वक काही बदल करण्यात आले होते. या सुधारणा रद्द करण्यासाठी काँग्रेसकडून हा निर्णय घेण्यात आला.

पाठ्यपुस्तकांमधील बदलांसंदर्भात एक समिती नेमण्यात आली होती. या समितीने १३ फेब्रुवारीपासून दिलेल्या सूचनांच्या आधारे हे बदल करण्यात आले आहेत. आधी असलेल्या पुस्तकांमध्ये काय काय बदल केले गेले पाहिजेत हे या समितीने सुचवले आहे. बारावीच्या या पाठ्यपुस्तकामध्ये स्वातंत्र्यलढ्याची माहिती असलेल्या धड्यामध्ये सावरकरांच्या नावामागील 'वीर' ही उपाधी हटवण्यात आली आहे. राजस्थान मधील काँग्रेस सरकारच्या या निर्णयाचा विरोध करून भाजपा आमदार वासुदेव देवनानी यांनी "क्रांतिवीरांचा अपमान हीच काँग्रेसची ओळख आहे" अशी प्रतिक्रिया दिली आहे.

जाणून घ्या काय आहेत बदल?

- स्वातंत्र्य चळवळीतले नेते या मजकुरात विनायक दामोदर सावरकर असे छापण्यात आले आहे. त्यांच्या नावपुढची वीर ही उपाधी हटवण्यात आली आहे.

- या पुस्तकामध्ये सावरकर हे हिंदू नेते असून त्यांनी भारताला हिंदूंचे राष्ट्र म्हणून ओळख द्यायचे काम केले असे म्हंटले आहे. तसेच, इंग्रजांच्या कैदीत असताना त्यांनी तब्बल चार वेळा दयेची याचिका केली होती, १९४२मध्ये भारत छोडो चळवळीला तर स्वातंत्र्य वेळी पाकिस्तानच्या निर्मितीला विरोध केला असे मांडण्यात आले आहे.

- १४ नोव्हेंबर १९११ रोजी ब्रिटीश सरकारला पाठवलेल्या विनंती पत्रात सावरकर यांनी स्वत:ला 'सन ऑफ पोर्तुगाल' म्हणवून घेतले होते, असे छापण्यात आले आहे.

- महात्मा गांधीजी यांची हत्या करण्यासाठी सावरकरांनी नथुराम गोडसेला मदत केली होती. मात्र, या आरोपांमधून त्यांची निर्दोष मुक्तता झाली, असा उल्लेख या धड्यामध्ये आहे.

माहितीच्या महापुरात रोजच्या रोज नेमका मजकूर मिळविण्यासाठी लाईक करा... facebook.com/MahaMTB/ आणि फॉलो करा twitter.com/MTarunBharat