‘अमूल’कडून ‘अभिनंदन’ला अनोखी मानवंदना!

 

 

देशभरातील अनेक लहानमोठ्या शहरांमध्ये सध्या अभिनंदन यांच्यासारखी मिशी ठेवण्याचा ट्रेंड दिसू लागला आहे. अनेक तरुणांनी अभिनंदन वर्धमान यांच्यासारख्या मिशा ठेवण्यास सुरुवात केली आहे. अभिनंदन यांच्यासारख्या मिशांचा हा ट्रेंड लक्षात घेऊन अमूलने एक जाहिरात केली आहे. बदलत्या काळाप्रमाणे बदलत जाणारा मिशांचा ट्रेंड, मिशांचे वेगवेगळे प्रकार या जाहिरातीतून दाखवण्यात आले आहेत.

 

सामान्य तरुणांपासून ते पोलीसांपर्यंत अनेकजण आपल्या मिशांना पिळ देताना या व्हिडिओमध्ये दिसत आहेत. व्हिडिओच्या शेवटी ग्लासभर दूध पिऊन एका लहान मुलीच्या ओठांवर दुधाच्या मिशा तयार झालेल्या दिसतात. ‘मूछ नही तो कुछ नही’ अशी संकल्पना यातून मांडण्यात आली आहे. या ९ सेकंदाचा व्हिडिओ अमूलने ट्विट केला आहे. अमूलकडून अभिनंदनसाठी ही अमूल मिशी अशी कॅप्शन अमूलने या व्हिडिओला दिली आहे. तसेच शुक्रवारी १ मार्चला अमूलने ‘अमूल गर्ल’च्या खास शैलीत कार्टूनद्वारे अभिनंदचे भारतात स्वागत केले होते.