बारामतीहून आलेली स्क्रिप्ट वाचून दाखवतात राज ठाकरे

मुंबई : राज ठाकरे हे कलाकार आहेत. त्यांच्या भाषणात ते बारामतीवरून आलेली स्क्रिप्ट वाचून दाखवतात. ते एकही आमदार, नगरसेवक निवडून आणू शकत नाहीत, अशी सणसणीत टिका मुख्यमंत्री देवेंद्र फडणवीस यांनी केली. मनसेच्या १३ व्या वर्धापनदिनी राज ठाकरे यांनी भाजपवर निशाणा साधला होता. त्यावर फडणवीस यांनी हे वक्तव्य केले. ते महिला मेळावा कार्यक्रमात मुंबईत बोलत होते. या कार्यक्रमाला परराष्ट्रमंत्री सुषमा स्वराजही उपस्थित होत्या.

मुख्यमंत्री म्हणाले की, राज ठाकरे हा १२ वा गडीही नाही आणि कप्तानही नाही. ते फक्त सुपारी घेऊन भाषण करत आहेत. याउलट मोदी हे सूर्यासारखे आहेत. राज्यात आम्ही ४५ जागा घेतल्याशिवाय गप्प बसणार नाही, असा निर्धारही यावेळी फडणवीस यांनी व्यक्त केला. पुलवामा येथील सीआरपीएफच्या जवानांवरील आत्मघाती हल्ल्यानंतर बालाकोट येथे भारतीय वायुसेनेने एअर स्ट्राईक करुन दहशतवाद्यांचे तळ उद्ध्वस्त केले होते. या मुद्द्यावरुन विरोधकांनी शंका उपस्थित केली होती आणि शनिवारी बोलताना राज ठाकरे यांनीही पुन्हा याच मुद्द्यावरुन पंतप्रधान नरेंद्र मोदी आणि केंद्र सरकारवर निशाणा साधला होता.

माहितीच्या महापुरात रोजच्या रोज नेमका मजकूर मिळविण्यासाठी लाईक करा... facebook.com/MahaMTB/ आणि फॉलो करा twitter.com/MTarunBharat