पंतप्रधान मोदींच्या आईंनी त्यांच्याकडून मागितले होते ‘हे’ वचन

 

‘ह्युमन्स ऑफ बॉम्बे’ या प्रसिद्ध सोशल मीडिया पेजला दिलेल्या मुलाखतीत पंतप्रधान मोदींनी ही गोष्ट सांगितली. या मुलाखतीत पंतप्रधान मोदींनी आणखी एक गोष्ट सांगितली. मोदींनी घेतलेली पंतप्रधानपदाची शपथ हा क्षण त्यांच्या आईसाठी फार विशेष असा आनंदाचा क्षण नव्हता. नरेंद्र मोदी हे गुजरातचे मुख्यमंत्री झाले, तेव्हा मोदींच्या आई हिराबेन यांना जास्त आनंद झाला होता. गुजरातच्या मुख्यमंत्रीपदाची शपथ घेतल्यानंतर मोदींनी आपल्या आईची त्यांनी भेट घेतली होती. पंतप्रधान मोदींनी या आठवणींना उजाळा दिला.

 

“अनेकवेळा लोक मला विचारतात, की तुम्ही पंतप्रधान झाल्यावर तुमच्या आईच्या काय भावना होत्या? कारण त्यावेळी प्रत्येक ठिकाणी माझे नाव घेतले जात होते. माझे फोटो लावले जात होते. सगळीकडे उत्साहपूर्ण वातावरण होते. परंतु मी गुजरातचा मुख्यमंत्री झालो, हा माझ्या आईसाठी मैलाचा दगड होता.” असे पंतप्रधान मोदी म्हणाले. गुजरातचे मुख्यमंत्री झाले, तेव्हा नरेंद्र मोदी दिल्लीमध्ये होते. गुजरातच्या मुख्यमंत्रीपदाचा शपथविधी पार पडण्यापूर्वी मोदींनी अहमदाबादमधील आपल्या घरी जाऊन आई हिराबेन यांची भेट घेतली होती. मोदी अहमदाबादला पोहोचले तेव्हा सगळीकडे आनंद, जल्लोष सुरु होता. हिराबेन मोदी यांना आपला मुलगा गुजरात राज्याचा मुख्यमंत्री होणार हे आधीच कळले होते.