‘जन संघर्ष यात्रा’ नावाची सहल

 

लोकसभा, विधानसभेच्या निवडणुकांमध्ये सपाटून मार खाल्लेल्या काँग्रेसचं गेल्या काही महिन्यांपासून राज्यातल्या, देशातल्या लोकांवर प्रेम ऊतू चाललंय. त्यातच जनसंघर्ष यात्रा या नावाखाली काँग्रेसच्या नेत्यांनी सहलीचं आयोजन केलंय. संघर्षयात्रा आणि त्यानंतर आता ‘जन संघर्ष यात्रा’ याद्वारेच काँग्रेसला संघर्ष करावा लागतोय, हे नक्की. निवडणुका आल्या की, राजकारणी मंडळी कामाला लागतात. एरव्ही पाच वर्षांमध्ये दुर्लभ झालेलं मुखदर्शनही या निमित्ताने दिवसातून किमान तीन वेळा होत असतं. त्यातच वर्षानुवर्ष सत्तेत असलेल्या पक्षाला अचानक सत्ता गमवावी लागल्यानंतर काय यातना भोगाव्या लागत असतील, हे काँग्रेसकडे पाहून समजतं. अनेक वर्षे सत्तेत असलेल्या काँग्रेसची आज, ‘ना घरका ना घाटका’ अशी स्थिती झाली आहे. याचंच उत्तम उदाहरण म्हणजे काँग्रेसने कर्नाटकात सत्तेसाठी केलेली खलबतं. सत्ता हवी आणि भाजपला नमवायचं यासाठी मोठा पक्ष असूनही काँग्रेसने जनता दलाला मुख्यमंत्रिपदाची ऑफर देऊन टाकली आणि ‘सत्तेसाठी काहीही’ हे पुन्हा एकदा सिद्ध केले. असो. महाराष्ट्रातही अगदी तीच स्थिती आहे. सत्तेसाठी काहीही करण्याची परिस्थिती काँग्रेसवर उद्भवली आहे.

जन संघर्ष यात्रा ही लोकसभा आणि विधानसभेच्या पार्श्वभूमीवर काँग्रेसकडून आयोजित करण्यात आलेली एक सहलच म्हणावी लागेल. एसी गाड्या, चकाचक तयार झालेले नेते यांना घेऊन ही सहल आयोजित करण्यात आली होती. काँग्रेसचे प्रदेशाध्यक्ष खा. अशोक चव्हाण, विरोधी पक्षनेते राधाकृष्ण विखे-पाटील, डॉ. भालचंद्र मुणगेकर, खा. हुसेन दलवाई अशा मोजक्याच काँग्रेसच्या नेत्यांची ही ‘संघर्ष’ यात्रा होती. ही तथाकथित सहल सावंतवाडीहून सुरू झाली. सहल जरी नवी असली तरी मुद्दे गेल्या वर्षी आयोजित करण्यात आलेल्या सहलीत घासून चोथा झालेलेच होते. जुनेच मुद्दे नवं लेबल लावून पुन्हा जनतेसमोर मांडण्याचा केविलवाणा प्रयत्न यानिमित्ताने सुरू होता. महाराष्ट्रात काँग्रेसमध्ये असलेल्या गटबाजीची स्थिती आजही तशीच आहे आणि लोकांमध्ये न मिसळता काम करणारे नेते काँग्रेसच्या कमिटीमध्ये आताही मिरवत आहेत. लोकांमध्ये मिसळून काम करण्यासाठी तशा प्रकारची मानसिकता लागते आणि काँग्रेसच्या काही नेत्यांमध्ये ही मानसिकता पूर्वीही नव्हती आणि आजही नाही.

जन संघर्ष यात्रेत काँग्रेसी नेत्यांनाच आपल्या अस्तित्वासाठी किती संघर्ष करावा लागतोय, हेही दिसून आलं. यातल्याच एका सभेदरम्यान पंतप्रधान नरेंद्र मोदी यांच्यावर आक्षेपार्ह विधान करून तर, मुख्यमंत्री देवेंद्र फडणवीस यांचा एकेरी उल्लेख करत टीका करण्यात आली. जन संघर्ष यात्रेत काँग्रेस नेते वसंत पुरके यांनी शब्दांची सीमा पार केली. त्यांच्या भाषणात शब्दांचा दर्जा घसरल्याचे पाहायला मिळाले. काँग्रेस ही काही मोदींच्या बापाची मालमत्ता नाही. सत्ताबदल होत असतो. काँग्रेसची सत्ता येताच पंतप्रधान नरेंद्र मोदी यांना तुरुंगात टाकल्याशिवाय राहणार नाही, असे आक्षेपार्ह वक्तव्य केले. तर मुख्यमंत्री देवेंद्र फडणवीस यांच्यावर टीका करतानाही पुरके यांनी त्यांचा एकेरी उल्लेख केला. “अनेक महिलांचे आयुष्य बरबाद करणारा बाबा राम रहीम हा फडणवीस यांना अष्टपैलू व्यक्ती वाटतो. आपला मुख्यमंत्री फडणवीसांना सल्ला आहे की, त्यांनी बाबा राम रहीम याला स्वत:च्या घरी घेऊन जावे. हा बाबा त्यांना एखादा पैलू तरी दाखवल्याशिवय राहणार नाही.” असे वक्तव्य करत आपल्या संस्कृतीचे आणि बुरशी लागलेल्या मेंदूचे उत्तम उदाहरण दाखवून दिले. सत्तेच्या हव्यासापायी कोणत्याही थराला जाऊन वक्तव्य करण्याची मानसिकता यावेळीही दिसून आली. काँग्रेसचा नुकताच या यात्रेचा टप्पा कोकणातून सुरू झाला.