मुंब्रा बायपास बंद असल्यामुळे वाहतुकीचा भार शीळ-कल्याण रस्त्यावर येत असल्यामुळे या रस्त्याच्या सहापदरीकरणाला त्वरित सुरुवात करण्याची मागणी जोर धरत होती. २१ किमीच्या या रस्त्याच्या कामातील १६ किमीच्या टप्प्यातील भूसंपादन पूर्ण झाले आहे. त्यामुळे त्वरित काम सुरू करण्याचे आदेश एकनाथ शिंदे यांनी बैठकीत दिले. त्यानुसार हे काम तातडीने हाती घेण्यात येणार आहे. या बैठकीला एमएसआरडीसीचे व्यवस्थापकीय संचालक राधेश्याम मोपलवार आणि अन्य वरिष्ठ अधिकारी उपस्थित होते.
जुना ब्रिटिशकालीन पत्रीपूल धोकादायक झाल्यामुळे त्यावरील वाहतूक थांबवून तो पाडण्याची भूमिका रेल्वे प्रशासनाने घेतल्यामुळे या परिसरालाही वाहतूककोंडीचा सामना करावा लागत आहे. शीळ-कल्याण सहापदरीकरण प्रकल्पात पत्रीपूल येथील नव्या पुलाचाही समावेश असून त्याचेही काम तातडीने सुरू करून सहापदरीकरणाबरोबरच संपविण्याचे नियोजन आहे, असे बैठकीत स्पष्ट करण्यात आले.
माहितीच्या महापुरात रोजच्या रोज नेमका मजकूर मिळविण्यासाठी लाईक करा... facebook.com/MahaMTB/