मुंबईत पावसाचा मुक्‍काम कायम; आज मुसळधार पावसाची शक्यता

दादर, शीव, भायखळा यांचा पुढचा भाग अर्थात मुख्य मुंबईच्या दिशेने पावसाचा जोर अधिक होता. शीव आणि किंग्ज सर्कल परिसरात गुडघाभर पाणी साचले होते तर, गांधी मार्केटमधल्या दुकानांमध्ये पाणी शिरले होते. कुर्ला ते टिळकनगर स्थानकादरम्यान हार्बर रेल्वे मार्गावर रुळावर पाणी भरले होते. कुर्ला ते वाशी स्थानकांदरम्यान मेगाब्लॉक असल्याने लोकल सेवा बंद असल्याने प्रवाशांनी रूळावरून चालण्याचा पर्याय निवडला. अंधेरी, जोगेश्वरी, मालाड, दहिसरमध्ये पावसाच्या जोरदार सरी सुरू होत्या. जोरदार पावसामुळे असल्फा परिसरात पाणी साचले होते. तर; मेट्रोच्या पश्‍चिम द्रुतगती महामार्ग स्थानकाखालीही पाणी साचलेे होते. दरम्यान, येत्या २४ तासांसाठी मुंबई, ठाणे, पालघर आणि रायगड जिल्ह्यात मुसळधार पाऊस पडेल, असा इशारा भारतीय हवामानशास्त्र विभागाने दिला आहे. शनिवारीदेखील पावसाने मुंबईसह संपूर्ण कोकण किनारपट्टीला जोरदार तडाखा दिला. मुसळधार पावसामुळे ठाणे, रायगड, पालघर जिल्ह्यांत पूरस्थिती निर्माण झाली. येथील सर्व नद्या दुथडी भरून वाहत होत्या. तसेच रायगड, पालघर, ठाणे या जिल्ह्यांना पावसाने झोडपले.