महाराष्ट् राज्य बाल हक्क आयोगाची शिफारससरोगसी कार्यप्रणाली निश्चित करण्यासाठी सरकारची समिती गठीत

 

महाराष्ट् राज्य बाल हक्क आयोगाची शिफारस

सरोगसी कार्यप्रणाली निश्चित करण्यासाठी सरकारची समिती गठीत

जळगाव, २ जुलै

देशभरामध्ये सरोगसी विषयी कायदा अस्तित्वात नसल्यामुळे अनियंत्रित चालणारी सरोगसी केंद्रे, रुग्णालय यांच्यावरती नियंत्रण आणण्याचा प्रयत्न बाल हक्क संरक्षण आयोगाने केला असून राज्यातील सरोगसी केंद्राबद्दल कडक निर्बंध करण्याच्या शिफारशी बालक हक्क संरक्षण आयोगाने केल्या आहेत. त्याबाबत सरकारने सरोगसी कार्यप्रणाली निश्‍चित करण्यासाठी समिती गठीत केली आहे.

महाराष्ट् राज्य बाल हक्क आयोगाने केलेल्या शिफारशी मध्ये संपूर्ण राज्यामध्ये सरोगसी प्रकरणे आणि सरोगसी केंद्रे भारतीय आयुर्विज्ञान संशोधन परिषदेच्या मार्गदर्शक तत्वानुसार चालतील यासाठी राज्यस्तरावर नियंत्रण मंडळ स्थापन करण्याची महत्वपुर्ण शिफारस करण्यात आली आहे. प्रत्येक जिल्ह्यात आरोग्य व गृहखात्याच्या प्रतिनिधींसोबत दोन नामवंत स्वयंसेवी संस्थांचे प्रतिनिधी असणार्‍या कृतीदलाची स्थापना करण्यात यावी असे म्हटले आहे. हे कृतीदल रुग्णालयांची मान्यता, रुग्णालयांची नोंदणी सरोगेट आई व मूल यांच्या सुरक्षिततेच्या विषयात काळजी घेईल. याबरोबरच ही सर्व केंद्रे भारतीय आयुर्विज्ञान संशोधन परिषदेच्या मार्गदर्शक तत्त्वानुसार चालतात की नाही याबद्दलही निगराणी करेल. शासन सरोगसी केंद्र नोंदणी करण्यासाठीची कार्यपद्धती व प्राधिकरण निश्चित करेल आणि त्यासंबंधिची सुचना प्रसृत करेल. सरोगसी केंद्र सुरू करणार्‍या रुग्णालयांना या प्राधिकृत केलेल्या प्राधिकरणाकडे नोंदणी करणे अनिवार्य असेल .सरोगसी करू इच्छिणार्‍या व्यक्तीची कौटुंबिक, सामाजिक, आर्थिक, वैधानिक परिस्थिती जाणून घेण्यासाठी आणि त्या कुटुंबाचे समुपदेशन करण्यासाठी जिल्हा महिला व बालविकास अधिकारी आणि जिल्हा आरोग्य अधिकारी समिती स्थापन करतील आणि कुटुंबाचा अहवाल तयार करतील. हा अहवाल बाल हक्क संरक्षण आयोग कायदा २००५ अन्वये कलम २५ नुसार स्थापित बाल न्यायालयासमोर मांडून परवानगी घेतल्यानंतरच सरोगसीची प्रक्रिया सुरू होईल. या सर्व प्रक्रियेमध्ये भारतीय आयुर्विज्ञान संशोधन परिषदेच्या मार्गदर्शक तत्त्वांचे काटेकोर पालन होईल. सरोगसीसाठी भाडोत्री गर्भ देणार्‍या स्त्रीचे व जन्म घेणार्‍या मुलाच्या भवितव्याच्या सुरक्षेच्या दृष्टीनेही विचार केला जाईल.