विविध कामांसाठी रेल्वेचा आज मेगाब्लॉक

मुंबई : विविध कामांसाठी रेल्वेच्या मध्य, हार्बर, पश्चिम मार्गावर रविवार, २४ जून रोजी सकाळी ११ ते दुपारी ४ दरम्यान मेगाब्लॉक घेण्यात येणार आहे. मध्य रेल्वेवर मुलुंड ते माटुंगा अप धीम्या मार्गावर सकाळी ११.१० ते दुपारी ४.१० पर्यंत ब्लॉक असणार आहे. त्यामुळे मुलुंड ते माटुंगामध्ये अप धीम्या मार्गावर सकाळी ११.१० ते दुपारी ४.१० पर्यंत अप धीम्या मार्गावरील वाहतूक अप जलद मार्गावरून वळविण्यात येणार आहे. या कालावधीत नाहूर, कांजुरमार्ग आणि विद्याविहार स्थानकांवर लोकल थांबणार नाहीत. ठाण्याहून सुटणाऱ्या सर्व अप धीम्या लोकल सकाळी १०.३७ ते दुपारी ४.०२ पर्यंत अप जलद मार्गावर मुलुंड ते माटुंगामध्ये चालवल्या जाणार आहेत. त्यांना मुलुंड, भांडुप, विक्रोळी, घाटकोपर, कुर्ला, शीव स्थानकात थांबणार आहेत. त्यानंतर या लोकल पुन्हा माटुंग्यानंतर अप मार्गावर वळविण्यात येणार आहेत.