बीएमसीकडून ५००० रुपये मागायला विसरू नका : नितेश राणे

मुंबई : महाराष्ट्रात उद्यापासून लागू करण्यात येणाऱ्या प्लास्टिक बंदीवरून आमदार नितेश राणे यांनी मुंबई महानगरपालिका आज जोरदार टीका केली आहे. प्लास्टिक वापरासाठी मुंबई महापालिकेला ५ हजार रुपये दंड देताना, महापालिकेकडून खड्ड्यांसाठी, कचऱ्यासाठी आणि नाल्यासाठीचे आपले ५ हजार रुपये मागण्यास विसरू नका' असा सल्ला राणे यांनी जनतेला दिला आहे. तसेच या नालायकांना जाब विचारण्याची हीच योग्य वेळ आहे, अशी जोरदार टीका देखील त्यांनी मुंबई महापालिकेवर केली आहे.

नुकत्याच काही वेळापूर्वी राणे यांनी ट्वीट करून हा मुद्दा उपस्थित केला आहे. नागरिकांनी जर प्लास्टिक वापरले तर त्यांच्याकडून ५ हजार रुपये दंड आकाराला जाणार आहे. परंतु जर रस्त्यावर खड्डे दिसले तर बीएमसीला किती रुपये दंड मागायचा ? असा प्रश्न राणे यांनी उपस्थित केला आहे. तसेच प्लास्टिक पिशवी चे ५००० रु देताना, मुंबई महानगरपालिकेकडून खड्ड्यांसाठी, कचऱ्यासाठी, नाल्यासाठी आपले ५००० रु मागायला विसरू नका, असा सल्ला त्यांनी नागरिकांना दिला आहे.