अभिराम भडकमकर यांना ‘संगीत नाटक अकादमी पुरस्कार’

संगीत नाटक अकादमी पुरस्कार हा कलाक्षेत्रात सर्वोच्च मानला जातो. मणिपूरमध्ये झालेल्या बैठकीत देशभरातील ४२ कलाकारांची तर उस्ताद बिस्मिल्ला खाँ युवा पुरस्कारासाठी ३४ कलाकारांच्या नावांची निवड करण्यात आली आहे. यात नाट्यक्षेत्रातील योगदानासाठी प्रसिद्ध नाट्यलेखक अभिराम भडकमकर व नाट्यदिग्दर्शक सुनील शानभाग यांची निवड करण्यात आली आहे. संगीत क्षेत्रातील योगदानासाठी प्रसिद्ध तबलावादक योगेश समसी यांची तर लोककलेतील योगदानासाठी लोककलांचे अभ्यासक डॉ. प्रकाश खांडगे यांची संगीत नाटक अकादमी पुरस्कारासाठी निवड झाली आहे. १ लाख रुपये रोख, ताम्रपत्र आणि शाल असे या पुरस्काराचे स्वरूप आहे. दरम्यान, “हा पुरस्कार प्राप्त झाल्यामुळे आपल्याला आनंद झाला असून हा केवळ माझाच नाही तर माझ्यासोबत काम करणार्‍या सर्वांचा सन्मान आहे. त्यांच्याच सहकार्यामुळे मला या पुरस्कारापर्यंत पोहोचता आले,” अशी प्रतिक्रिया नाट्यलेखक अभिराम भडकमकर यांनी ‘दै. मुंबई तरुण भारत’शी बोलताना व्यक्त केली.

सावनी शेंडे व आदित्य खांडवे यांना युवा पुरस्कार

शास्त्रीय संगीत क्षेत्रातील योगदानासाठी प्रसिद्ध गयिका सावनी शेंडे व आदित्य खांडवे यांना २०१७ सालचा उस्ताद बिस्मिल्ला खाँ युवा पुरस्कार जाहीर झाला आहे. २५ हजार रुपये रोख, ताम्रपत्र आणि शाल असे या पुरस्काराचे स्वरूप आहे.