पवारसाहेब, चहावाल्यांच्या नादाला लागू नका ! : मुख्यमंत्र्यांचा रूद्रावतार

 

 

 

 

 

 

 

 

आपल्या भाषणात भाजप कार्यकर्त्यांना उद्देशून मुख्यमंत्री म्हणाले की, आपण कोण आहोत हे आपण लक्षात ठेवले पाहिजे. आपले आद्यपुरूष डॉ. शामाप्रसाद मुखर्जी आहेत, आपले महापुरूष अटलबिहारी वाजपेयी आहेत, आपले लोहपुरूष लालकृष्ण अडवाणी आहेत तर युगपुरूष नरेंद्र मोदी आहेत. ही आपली परंपरा आहे. आपल्या पक्षाला एकेकाळी भटा-बामणांचा पक्ष म्हणून हिणवलं गेलं. पण आज हा पक्ष सर्व समाजाला सोबत घेऊन जाणारा पक्ष म्हणून ओळखला जातो. आज इथे समोर बसलेला जनसमुदाय पाहिला की 'शिवसाम्राज्य' काय असते, याचे दर्शन होत असल्याचे प्रतिपादन मुख्यमंत्र्यांनी केले. शिवसेनेचे संस्थापक बाळासाहेब ठाकरे यांनाही यावेळी 'हिंदूहृदयसम्राट' म्हणत अभिवादन करण्यास फडणवीस विसरले नाहीत. विरोधी पक्षांवर सडकून टीका करत असतानाच, 'मी भरलेल्या वर्गाचा मॉनिटर आहे, तुमच्यासारखा रिकाम्या वर्गाचा नाही' असा टोलाही मुख्यमंत्र्यांनी शरद पवार यांना लगावला. भाजप हा सिंहांचा पक्ष आहे, कितीही लांडगे आले तरी कोणी काहीही वाकडे करू शकणार नाही, असेही त्यांनी स्पष्ट केले. तुम्ही महाराष्ट्राच्या तिजोरीवर 'डल्ला' मारलात, आता 'हल्लाबोल' करता आहात, जनता तुम्हाला धडा शिकवल्याशिवाय राहणार नसल्याचे ते म्हणाले.