सत्य साधू ओळखाया | बुद्धि द्यावी गणराया ||

 

 

 

 

 

जयजयाजी गणनायका | कृपा करा वरदायका |

बुद्धि द्यावी अज्ञ लोकां | साधू खरा ओळखाया ||१||

 

कलिमाजी सांप्रत काळी | बुद्धिभेद जाला प्रबळी |

संत-संत म्हणती सकळी | भोंदू आणिक ढोंग्यांसी ||२||

 

परि त्वा करावे प्रबोधन | भ्रम शंकांचे ते निरसन |

असंतांचे करण्या निर्दालन | द्यावा विवेक प्रसाद ||३||

 

बहुत जाले संत महंत | तैसेचि ऋषिमुनी पंत-तंत |

राजर्षि आणिक राष्ट्रसंत | रत्नप्रसवा भूवरी या ||४||

 

आधी केले स्वतः साधन | अध्यात्मविद्येचे रसायन |

प्राशन केले स्वये आपण | मग दिधले भक्तांसि ||५||

 

पूर्वापार चालिती प्रमाण | राखिला गा तयाचा मान |

अहंकार दंभादि अज्ञान | दूर केले ज्ञानप्रकाशे ||६||

 

विश्व मिथ्या देह नश्वर | सत्य जाणिले सत्वर |

अविद्येचे भेदिले घर | ब्रह्मविद्या अनुभवे ||७||

 

काम, क्रोध गेले बळीं | लोभ, मोह स्वये उन्मळी |

मद, मत्सर धूम्रमेळी | उन्नयन अंतर्यामि ||८||

 

स्वये केले धर्माचरण | करोनि अधर्माचे उच्चाटण |

करावया पाखंड खंडन | शब्दखड्ग धारण केले ||९||

 

तिन्ही एषणांचे स्वामित्व | रंजल्यां गांजल्यां ममत्त्व |

सदाचरण सत्संग सत्व | प्रस्थापिले निकांमाजी ||१०||

 

सकळांसी देवा सांगावे | संतलक्षण पुन्हा निरुपावे |

पुन्हा एकदा दाखवावे | विराट रूप धर्माचे ||११||

 

कलिबल आता वाढले | थैमान दुर्जनांनी मांडले |

संस्कारांचे बंधन तोडले | संत म्हणविती भोगी ||१२||

 

बळें भ्रष्टविती परदारा | मद – मत्सराचा पिसारा |

काम क्रोधाचा वाहतो झरा | पाऊणशे वयोमानीही ||१३||

 

उपभोग थांबवी न जरा | धनिक भक्तांवरी नजरा |

चाड मनाची न जरा | भयही नसे कर्माचे ||१४||

 

अज्ञानाचा करिती कहर | जमवूनि मूर्खांचे नगर |

विवेकाचा करुनि अव्हेर | बाजार मांडिला धर्माचा ||१५||

 

भक्त देखील अंध जाले | सत्यासत्यासि न पुसले |

सांगोवांगी विसंबले | मेंढरांची स्थिती बरी ||१६||

 

वर्तनासि या क्षमा नाही | अधर्म सदाचि यमा पाही |

नीतिची परि तमा काही | बाळगावीच सर्वांनी ||१७||

 

असंतांचा व्हावा उच्छेद | नीर-क्षीरे करावा भेद |

धर्मापासुनि विच्छेद | एकघावे करावा त्वरे ||१८||

 

देव, नाव, होम, हवन | स्थान, मान, दान, स्तवन |

कीर्ति, मूर्ती, भजन, भवन | भुलू नये कशासिही ||१९||

 

शुचि, द्युति, मति, नीति | कृती, प्रीति, धृति, स्फूर्ती |

तृप्ती, दीप्ति, सत्प्रवृत्ती | जाणावी संतलक्षणे ||२०||

 

म्हणोनि बुद्धि द्या गणराया | देव देश धर्म ताराया |

आणिक साधु ओळखाया | प्रार्थना करी सदाशिव ||२१||

 

|| लेखनसीमा ||