पुण्याची माणसं कष्टाळू, अजित पवारांकडून सुनील देवधरांची प्रशंसा

कापसावरील बोंडअळी व राज्यात काही भागात झालेली गारपीट या विषयावर अजित पवार यांनी आज विधानसभेत सुमारे तासभर भाषण केलं. यावेळी पवार यांनी अनेकवेळा राजकीय टीकाटिप्पणीही केली. समोर बसलेल्या भाजप मंत्र्यांना उद्देशून अजित पवार म्हणाले की, तुम्ही निवडून आलात, ही पंतप्रधान नरेंद्र मोदी यांची मेहेरबानी आहे हे लक्षात घ्या. यावर जलसंपदा मंत्री गिरीश महाजन यांनी 'ही तुमचीही मेहरबानी आहे' असा उलट टोला अजित पवार यांना लगावला. यावर, तुम्ही मोदींचे नाव न घेता निवडणूक लढवून दाखवाच, असे आव्हान भाजप मंत्र्यांना केले. यावेळी त्रिपुरा विधानसभा निवडणुकीचा संदर्भ देत त्रिपुरातही भाजपचे कार्यकर्ते नव्हते मात्र मोदींच्या नावावर त्रिपुरात भाजप विजयी झाला, असा मुद्दा अजित पवारांनी मांडला.

याचवेळी त्रिपुरातील सुनील देवधर यांचे नाव भाजप मंत्र्यांकडून घेण्यात आले. यावर अजित पवार उत्तरले, हो, सुनील देवधर खाली काम करत होतेच. आमची पुण्याची माणसं कष्टाळू असतातच. पण, अंतिम चेहरा मोदी यांचाच तर होता. अजितदादांच्या या स्पष्टीकरणावर महाजन यांनी नापसंती दर्शवली. यावर, अहो, चेहरा पाहूनच लोक आकर्षित होतात, हे मी तुम्हाला सांगायला हवं का? असा प्रतिटोला अजित पवार यांनी महाजन यांना लगावला.