मेस्मा कायद्यावरून विधानसभेत गदारोळ, कामकाज स्थगित

'कुपोषणमुक्त महाराष्ट्र' करण्यासाठीच अंगणवाडी सेविकांना मेस्मा कायदा लागू करण्यात आला असून त्याबाबत चर्चा करण्यासाठी बैठक घेऊ, असे प्रतिपादन महिला व बालविकास मंत्री पंकजा मुंडे यांनी आज विधानसभेत निवेदनाद्वारे केले. पंकजा मुंडे म्हणाल्या की, या कायद्याबाबत बैठक घेऊन संघटनांचे म्हणणे ऐकून घेऊ. गेल्या वर्षी राज्यात अंगणवाडी कर्मचाऱ्यांनी पुकारलेल्या संपाच्या काळात मागण्या मान्य झाल्यानंतरही काही संघटनांनी संप सुरुच ठेवला होता. त्यामुळे बालकांच्या पोषण आहारावर परिणाम झाला होता, असेही त्यांनी निदर्शनास आणून दिले. अंगणवाडी सेविकांच्या विविध मागण्या मान्य करण्यात आल्या असून सर्वात महत्वाची, मानधन वाढीची मागणी पूर्ण केली आहे. त्याचबरोबर वयाची अट देखील वाढवण्यात आली आहे. माता व बालकांना वेळेवर पोषण आहार देण्याचे काम अंगणवाडी सेविकांच्या माध्यमातून केले जाते. त्यामुळे कुपोषण मुक्तीसाठीच मेस्मा लावण्याचा निर्णय घेतल्याचे पंकजा मुंडे यांनी यावेळी स्पष्ट केले.