गाळ्यांचा लिलाव होऊ देणार नाही!

महापालिकेच्या १८ मार्केटमधील भाडेकराराची मुदत संपलेल्या गाळ्यांचा प्रशासन लिलाव करू पाहत आहे. मात्र, यात गाळेधारकांवर मोठा अन्याय होत असल्याने गाळ्यांचा लिलाव होऊ देणार नसल्याचे गाळेधारकांतर्फे आयोजित पत्रपरिषदेत सांगण्यात आले.

 

 

हिरानंद मंधवाणी यांनी गाळ्यांचा तिढा सोडविण्यासाठी आजपर्यंत झालेल्या प्रयत्नांची माहिती दिली. नगरपालिकेने ३१ मार्च २०१२ नंतर भाड्याची रक्कम स्वीकारणे अचानकपणे थांबविले. मागणी केली नसल्याचे कारण त्यासाठी देण्यात आले. परंतु प्रशासनाने २०१५ मध्ये अचानक तीन वर्षांच्या भाड्याची मागणी गाळेधारकांकडे केली. गाळेधारकांना थकबाकीदार ठरविण्याचा हे षड्यंत्र होते. गाळेधारकांची ‘हरकत कायम ठेवून’ त्यांच्या गाळ्यांचे भाडे स्वीकारावे ही आमची मनपाकडे मागणी होती. करार संपल्यानंतर त्याचे ३ वर्षांसाठी नूतनीकरण करायला हवे होते. या सर्व प्रकरणात जळगाव शहराला ‘वेठीस कुणी धरलं, अडचणीत कुणी आणलं?’ असा थेट प्रश्‍नही उपस्थित केला. गाळेधारक आजही भाडे भरायला तयार आहे. ते अनधिकृत भोगवटादार नाहीत. २०१२ नुसार प्रचलित भाडेआकारणी करावी ही प्रमुख मागणी असल्याचे हिरानंद मंधवाणी यांनी सांगितले.

 

 

तत्पूर्वी सकाळी गाळेधारकांची बैठक झाली. यात हिरानंद मंधवाणी, प्रेमचंद समदानी, रमेश मतानी, राजकुमार अडवाणी, तेजस देपुरा, संजय पाटील, युवराज वाघ, प्रदीप जैन यांच्यासह अधिक गाळेधारक उपस्थित होते. बैठकीत २० मार्चपासून पुकारण्यात येणार्‍या बंदबाबत चर्चा करण्यात आली. सकाळी ११ वाजता जिल्हाधिकारी कार्यालयावर निघणार्‍या महामोर्चात सहभागी होण्याचे आवाहन करण्यात आले.