उत्तर प्रदेशमध्ये भाजपला धक्का, बिहारमध्येही कमळ कोमेजले

गोरखपूर आणि फुलपूर मतदारसंघातील पराभव भारतीय जनता पक्षासाठी खूपच धक्कादायक आहे. या दोन्ही मतदारसंघाचे प्रतिनिधित्त्व मुख्यमंत्री योगी आदित्यनाथ आणि उपमुख्यमंत्री केशव प्रसाद मौर्य करत असल्याने ही पोटनिवडणूक भाजपासाठी प्रतिष्ठेची होती. यापूर्वी लोकसभा निवडणुकीत या दोन्ही मतदारसंघात भाजपाने मोठ्या मताधिक्याने विजय मिळवला होता. मात्र आता लोकसभा पोटनिवडणुकांच्या निकालाने भाजपला चांगलाच धक्का बसला आहे. उत्तर प्रदेशचे उपमुख्यमंत्री केशवप्रसाद मौर्य यांचा बालेकिल्ला समजला जाणाऱ्या फुलपूर लोकसभा मतदार संघातही पक्षाला दारूण पराभव स्वीकारावा लागला आहे. मुख्यमंत्री व उपमुख्यमंत्री या दोघांच्याही जागा गेल्यामुळे भाजपला हा जबर धक्का बसला असल्याचे बोलले जात आहे.

  

आज सकाळी या मतमोजणीला सुरुवात झाली असून सकाळपासून भाजप आणि सपा-बसपा आघाडी यांच्यामध्ये या दोन्ही ठिकाणी कलगीतुरा रंगला होता. मात्र आता शेवटी सपा-बसपा यांच्याकडून निकाल लागला आहे. इतक्या मोठ्या प्रमाणात लोकसभा पोटनिवडणुकांमध्ये यश मिळाल्याने समाजवादी पक्षाच्या सर्वेसर्वा मायावती, उत्तर प्रदेशचे माजी मुख्यमंत्री अखिलेश यादव आणि बिहारचे माजी उपमुख्यमंत्री तेजस्वी यादव यांनी जल्लोष साजरा करत आपल्या प्रतिक्रिया दिल्या आहेत.