व्यंगचित्र म्हटलं की, आपल्याला विनोदी चित्र, मार्मिक चित्र, अर्क चित्र, अश्लिल किंवा चावट चित्र, मिश्किल चित्र इत्यादी प्रकार आठवतात. आर. के. लक्ष्मण, बाळासाहेब ठाकरे, राज ठाकरे अशा ख्यातकीर्त व्यंगचित्रकारांनी तर सामाजिक विषयांना राजकीय बाज देऊन जी व्यंगचित्रे काढली, त्यामुळे ‘राजकीय व्यंगचित्र’ हा विषय अधिक लोकप्रिय झाला. व्यंगचित्रांवर आणखी आगळ्या-वेगळ्या पद्धतीने विचार करत वरील व्यंगचित्रांबद्दल जे लोकांचे मत बनलेले आहे, त्याला जरा वेगळ्याच मार्गाने नेऊन व्यंगचित्रकार ल. हु. काळे यांनी केवळ ‘कृषी’विषयावरच व्यंगचित्रे रेखाटली आहेत.
कार्टुनबॉक्समध्ये विषयाला अनुसरून यथायोग्य ‘डेप्थ ऑफ फिल्ड’ साधलेले असते. हेच त्यांच्या व्यंगचित्रांकनाचे वैशिष्ट्य ठरावे. पिवळा, निळा, लाल, हिरवा, काळा हे मुख्य रंग आणि त्यांच्या फिक्कट वा गडद छटा यांचा विषयानुरूप उपयोग करून त्यांचं कृषिव्यंग सजतं. औरंगाबादच्या शासकीय कलामहाविद्यालयात पेंटिंगची पदवी घेऊन पुढे मुंबईला डीपए.एड. हा पदविका अभ्यासक्रम पूर्ण करून त्यांनी विविध नोकर्यांचे अनुभव घेतले. अनेक पुरस्कार, अनेक प्रदर्शने आणि अनेक ठिकाणी विषयतज्ज्ञ म्हणून त्यांनी काम पाहिले आहे. आजच्या वृत्तपत्रीय जगतात व्यंगचित्रकारांची वानवा आहे. फारच थोडे व्यंगचित्रकार या क्षेत्रात आहेत. म्हणून कृषिव्यंगचित्रकार ल. हु. काळे म्हणतात की, “व्यंगचित्रांना चांगले दिवस आणण्याची जबाबदारी व्यंगचित्रकार आणि प्रसारमाध्यमांची आहे.” त्यांना नुकताच जागतिक पातळीवरील पुरस्कार मिळाल्यामुळे त्यांच्या व्यंगचित्रांतील सामाजिक बांधिलकी जपणार्या माणुसकीला शुभेच्छांसह सदिच्छा!
माहितीच्या महापुरात रोजच्या रोज नेमका मजकूर मिळविण्यासाठी लाईक करा... facebook.com/MahaMTB/