सुरक्षित भविष्यासाठी डाक विभागाच्या योजना ‘संजीवनी’ - सेलुकर

 

भारतीय डाक विभागातर्फे विविध बचत ठेव योजना तसेच विमा योजना सर्वसामान्य नागरिकांसाठी सुरू करण्यात आल्या असून डाक विभागाने आधुनिक तंत्रज्ञानाची कास धरून ऑनलाईन सेवेलासुद्धा प्रारंभ केला आहे.

 

 

त्यामुळे सर्वसामान्य नागरिकांसाठी डाक विभागाच्या योजना भविष्याच्या सुरक्षिततेसाठी संजीवनी ठरणार असल्याचे प्रतिपादन भुसावळ विभागाचे अधीक्षक बी. बी. सेलुकर यांनी केले.

 

 

भुसावळ येथील मुख्य कार्यालयात आयोजित पोस्ट फोरमच्या बैठकीत ते बोलत होते. भुसावळ विभागात असलेल्या डाक कार्यालयांमध्ये उच्च प्रतीच्या चांगल्या व तत्पर सेवा देण्याच्या हेतूने पोस्ट फोरम समिती स्थापन करण्यात आली आहे.

 

 

या समितीच्या बैठकीत बोलताना डाक अधीक्षक बी. बी. सेलुकर यांनी भारतीय डाक विभाग राबवत असलेल्या बचत ठेव, सुकन्या समृद्धी योजना, पुनरावृत्ती ठेव खाते, सावधी जमा खाते, मासिक आय योजना, लोक भविष्य खाते, ज्येष्ठ नागरिक बचत, राष्ट्रीय बचत पत्र, किसान विकास पत्र अशा बचत व ठेव योजनांची सविस्तर माहिती देऊन विमा योजना, आधार नोंदणी व नूतनीकरण, ऑनलाईन सुविधा, ग्रामीण डाक जीवन बिमा, स्पीड पोस्ट या नावीन्यपूर्ण सुविधांचा लाभ सर्वसामान्य नागरिकांपर्यंत पोहोचविण्याचे त्यांनी आवाहन केले. लघुउद्योग, विद्यार्थी, शेतकरी, शहरी प्रवासी, ज्येष्ठ नागरिक, गृहिणी, ग्रामीण विद्यार्थी, ग्रामीण नागरिक अशांसाठी इंडिया पोस्ट पेमेंट बँकेमार्फत सुविधा पुरविल्या जात असल्याचेही त्यांनी सांगितले. पोस्ट फोरम ही समिती भुसावळ विभागातील विविध पोस्ट कार्यालयांमध्ये जाऊन तेथील सेवा सुविधांबाबत सल्ला देण्याचे काम करणार आहे.

 

 

या बैठकीला पोस्ट फोरम समितीचे अध्यक्ष डाक अधीक्षक बी. बी. सेलुकर, सदस्य डॉ. डी. पी. पाटील, ए. एस. वाणी, डॉ. अनंत चौधरी, डॉ. जगदीश पाटील, राजेश गोडबोले, मो. एजाज शेख इस्माईल यांच्यासह भुसावल डाक विभागातील अशोक चौधरी, निशांत शर्मा, आर. एन. सोमन, मनीष तायडे, गोपाल पाटील, ए. बी. शेख, एफ. के. सैयद आदी अधिकारी उपस्थित होते.