नवी मुंबई : सानपाड्यातील एका संस्थेला मशीद उभारण्यासाठी देण्यात आलेला भूखंड रद्द करावा, यासाठी अखिल भारतीय सानपाडा रहिवासी महासंघाच्यावतीने दि. २७ नोव्हेंबर रोजी मुंबई पुणे महामार्गावर चक्का जाम आंदोलन करण्यात येणार आहे. तसेच हा भूखंड रद्द न केल्यास संघटनेच्या १४ सदस्यांनी प्रशासनाला आत्मदहनाचा इशारादेखील दिला आहे. तंजीमुल मुस्लीम सोसायटीने मशीद उभारण्यासाठी २००१ सालापासून सिडकोकडे मागणी केली होती. सिडकोने सदर संस्थेला मशीदीसाठी भूखंड देण्यापूर्वी कायदा सुव्यवस्थेच्या दृष्टीकोनातून पोलीस विभागाने खात्री करून ना हरकत प्रमाणपत्र देण्याची सुचना केली होती, अशी माहिती अखिल भारतीय सानपाडा रहिवासी महासंघाचे सदस्य संतोष पाचलग यांनी दै. मुंबई तरूण भारतशी बोलताना दिली. त्यानंतर जुलै २००८ साली स्थानिकांचा प्रखर विरोध असतानाही सेक्टर ८ येथील भूखंडावर मशिद बांधण्यास परवानगी देण्यास हरकत नसल्याचा अहवाल देण्यात आल्याचेही त्यांनी सांगितले.
“आज या संदर्भात बैठक झाली. यासंदर्भात अधिक माहिती देता येणार नाही. परंतु मंगळवारी पोलिसांना बंदोबस्त लावण्यात येणार आहे आणि कोणताही अनुचित प्रकार घडू नये याची दखल घेतली जाईल.”
पी.एल.कुंभार,
पोलीस नाईक,
सानपाडा पोलीस स्थानक
“आम्ही कोणत्याही धर्माविरोधात नाही किंवा मशीद उभारण्यासाठीही आमचा विरोध नाही. यासंदर्भात आम्ही कमिश्नर, सिडकोचे अध्यक्ष आ. प्रशांत ठाकूर यांच्याशी संपर्क साधला असून यावर तोडगा काढण्याची विनंती केली आहे. जर यावर तोडगा निघाला नाही तर मंगळवारी मुंबई पुणे महामार्गावर चक्का जाम आंदोलन, सामुहिक मुंडन आणि १४ जण आत्मदहन करणार आहोत.”
संतोष पाचलग,
सदस्य, अखिल भारतीय सानपाडा रहिवासी महासंघ