माझी कन्या भाग्यश्री योजना

 

 

मुलींचा जन्मदर वाढविणे, लिंग निवडीस प्रतिबंध करणे, मुलींचे शिक्षण व आरोग्याचा दर्जा वाढविण्यास प्रोत्साहन देण्यासाठी शासनातर्फे ‘बेटी बचाओ, बेटी पढाओ’ व ‘सुकन्या समृद्धी’ योजना अशा योजनांच्या माध्यमातून प्रयत्न केले जात आहेत. अशाच स्वरुपाची महाराष्ट्र शासनाची महिला व बालविकास विभागामार्फत राबविण्यात येणारी ‘माझी कन्या भाग्यश्री’ योजना 01 ऑगस्ट 2017 पासून सुधारित स्वरुपात राबविण्यास 18 जुलै 2017 रोजीच्या मंत्रिमंडळ बैठकीत मान्यता देण्यात आली आहे. यामुळे ज्या कुटुंबाचे वार्षिक उत्पन्न 7 लाख 50 हजार रुपयांपर्यंत आहे, अशा कुटुंबांनाही या योजनेचा आता लाभ मिळणार आहे.

 

 

राज्यात 1 एप्रिल 2016 पासून माझी कन्या भाग्यश्री योजना राबविण्यात येत आहे. या योजनेचा लाभ घेण्यासाठी दारिद्य्ररेषेखालील (बीपीएल) तसेच वार्षिक उत्पन्न एक लाखापर्यंत असणारी (एपीएल) कुटुंबे पात्र ठरविण्यात येत होती. आता ही सुधारित योजना 7.50 लाख रुपये उत्पन्न असणार्‍या सर्व घटकातील कुटुंबांना लागू असेल, अशी तरतूद करण्यात आली आहे.

योजनेंतर्गत एका मुलीनंतर आई किंवा वडिलांनी कुटुंंब नियोजन शस्त्रक्रिया केल्यानंतर शासनाकडून मुलीच्या नावे रुपये 50,000/- तर दोन मुलीनंतर कुटुंब नियोजन शस्त्रक्रिया केल्यास दोन्ही मुलींच्या नावे प्रत्येकी 25,000/- रुपये बँकेत मुदत ठेव योजनेत गुंतविण्यात येईल. तसेच मुद्दल आणि व्याज मुलीला वयाच्या 6 व्या वर्षी आणि 12 व्या आणि 18 व्या वर्षी काढता येईल, अशी व्यवस्था करण्यात आली आहे. तथापी आई किंवा वडील यांनी कुटुंब नियोजन शस्त्रक्रिया केल्यानंतरच ठेवीची रक्कम मुलीच्या नावावर जमा करण्यात येईल.

 

 

मुलीला रु. 50,000/- इतक्या रक्कमेवर 6 वर्षासाठी अनुज्ञेय होणार. परंतु, व्याज मुलीला वयाच्या 6 व्या वर्षी काढता येईल.

पुन्हा मुद्दल रु. 50,000/- गुंतवणूक करून 6 वर्षासाठी अनुज्ञेय होणारे व्याज वयाच्या 12 व्या वर्षी काढता येईल. पुन्हा मुद्दल रु. 50,000/- गुंतवणूक करून 6 वर्षासाठी अनुज्ञेय होणारे व्याज अधिक मुद्दल, दोन्ही रक्कम वयाच्या 18 व्या वर्षी काढता येईल. दोन मुलींच्या बाबतित (प्रकार 2) रु. 25,000/- रक्कम काढण्याबाबत वरीलप्रमाणेच प्रकिया राहील.

 

* या योजनेंतर्गत लाभार्थी मुलगी व तिची आई यांचे संयुक्त बचत खाते बँक ऑफ महाराष्ट्र या राष्ट्रीयकृत बँकेत उघडण्यात येणार असल्यामुळे या योजनेंतर्गत रुपये 1 लाख अपघात विमा व रुपये 5000/- ओव्हर ड्राफ्ट व इतर अनुज्ञेय लाभ घेता येतील.

 

 

या योजनेंतर्गत अनुज्ञेय लाभ हे प्रधानमंत्री जन-धन योजनेंतर्गत बँक बचत खात्यात देण्यात येणार असल्यामुळे हे खाते उघडण्यास लाभार्थ्यांना अंगणवाडी सेविका/ मुख्य सेविका/ पर्यवेक्षिका मदत करतील.