माळशेज बोगद्यासाठी गडकरींना साकडे

पावसाळ्याच्या काळात दरड कोसळल्यामुळे माळशेज घाटातील वाहतूक ठप्प होते. या काळात कल्याणहून नगरकडे वा नगरहून कल्याणकडे येणार्‍या हजारो नागरीक, व्यापारी आणि प्रवाशांना चाकण, तळेगावमार्गे वळसा घालावा लागतो. या काळात नाहक वेळ व पैसा खर्च होतो. या पार्श्वभूमीवर माळशेज घाटातून बोगदा काढल्यास पावसाळ्याच्या काळात वाहतूक बंद राहणार नाही. या बोगद्याला सरकारने मंजुरीही दिली आहे. मात्र, त्याचे काम अद्याप सुरू झालेले नाही. या पार्श्वभूमीवर खा. कपिल पाटील व आ. किसन कथोरे यांनी काल मुंबईतील सह्याद्री अतिथीगृहात केंद्रीय मंत्री नितीन गडकरी यांची भेट घेतली. या मागणीचा प्राधान्याने विचार करण्याचे आश्वासन मंत्री गडकरी यांनी दिले.