देशात मोदींचीच हवा : रामदास आठवले

मुंबई : देशात हवा कुणाची आहे हे मला अचूक कळतं; आणखी दहा वर्ष प्रधानमंत्री नरेंद्र मोदी यांचीच हवा राहणार आहे. काँग्रेसने मला केंद्रात मंत्रिपद दिले नाही मात्र प्रधानमंत्री नरेंद्र मोदींनी मला केंद्रीयमंत्रीमंडळात स्थान दिले आहे. त्यामुळे पुढील दहा वर्षे मी भाजपसोबत एनडीए मध्येच राहणार आहे. मात्र, राजकारणात हवा कुणाची आहे याचा अचूक अंदाज घेऊनच मी नेहमी निर्णय घेत असतो अशी प्रतिक्रिया रिपब्लिकन पक्षाचे राष्ट्रीय अध्यक्ष केंद्रीय सामाजिक न्याय राज्यमंत्री ना रामदास आठवले यांनी दिली.

काँग्रेस सोबत १५ वर्ष होतो त्यामुळे भाजपसोबत आणखी १५ वर्ष राहणार आहे. त्यामुळे माझ्या विधानाचा कोणी विपर्यास करू नये. रिपब्लिकन पक्ष आगामी २०१९ मध्ये भाजप सोबत केंद्रात नरेंद्र मोदी आणि राज्यात देवेंद्र फडणवीस यांना भक्कम साथ देणार आहे. त्यानंतरची दहा वर्षही आम्ही भाजपला साथ देणार असून त्यात कोणतीही शंका घेण्याचे कारण नाही असा खुलासा ना रामदास आठवले यांनी आज प्रसिद्धीपत्रकाद्वारे केला आहे.

मुंबईत कुर्ला येथे एका जाहीर कार्यक्रमात काँग्रेसचे आमदार मोहम्मद आरिफ नसीम खान यांनी रामदास आठवलेंनी युती तोडल्यामुळे काँग्रेसची सत्ता गेली त्यामुळे आठवलेंनी काँग्रेस सोबत पुन्हा युती करण्याचे आवाहन केले. त्याला उत्तर देताना ना रामदास आठवले यांनी आपण अजून दहा वर्ष भाजप सोबतच्या युतीमध्येच राहणार आहोत. तसेच अजून दहा वर्ष देशात प्रधानमंत्री नरेंद्र मोदींचीच हवा राहणार असून अजून दहा वर्षे काँग्रेस सत्तेत परत येऊ शकत नसल्याचे रामदास आठवले यांनी स्पष्ट केले. यावेळी विचारमंचावर काँग्रेसचे ज्येष्ठ नेते माजी मुख्यमंत्री सुशीलकुमार शिंदे उपस्थित होते.

माहितीच्या महापुरात रोजच्या रोज नेमका मजकूर मिळविण्यासाठी लाईक करा... facebook.com/MahaMTB/