एका सामान्य, मध्यमवर्गीय कुटुंबाने परिश्रमपूर्वक उभा केलेला आणि वाढवलेला उद्योग म्हणजे ‘एसकेएसपीएल’ अर्थात ‘श्री कृपा सर्व्हिसेस प्रायव्हेट लिमिटेड.’ पुण्याच्या महेश व राघवेंद्र खेडकर बंधूंनी उभी केलेली ही कंपनी आज सेवा व व्यवस्थापन क्षेत्रातील एक अग्रगण्य कंपनी म्हणून ओळखली जाते. कंपनी नावारूपाला आल्यानंतर आता भविष्यातील विस्तारही कंपनीच्या नेतृत्वाला खुणावतो आहे.
उद्योजकाचे नाव : महेश खेडकर, राघवेंद्र खेडकर
कंपनीचे नाव : श्री कृपा सर्व्हिसेस प्रा. लि.
कंपनीची सेवा : फॅसिलिटी, सॉलिड वेस्ट मॅनेजमेंट
व्यावसायिक कार्यक्षेत्र : देशांतर्गत
वार्षिक उलाढाल : १२५ कोटी
कर्मचारी संख्या : ८५००
भविष्यातील लक्ष्य : २०२० पर्यंत ५०० कोटी
‘एससकेएसपीएल ग्रुप’द्वारा फॅसिलिटी मॅनेजमेंट, ट्रान्सपोर्टेशन अॅण्ड मोबिलिटी, लॉजिस्टिक मॅनेजमेंट, सॉलिड वेस्ट मॅनेजमेंट, स्कील डेव्हलपमेंट आदी क्षेत्रांत सेवा व व्यवस्थापन पुरवले जाते. पुण्याजवळ आकुर्डी येथे आज प्रशस्त कार्यालयात असलेली ‘एसकेएसपीएल’ कंपनी १९९१ मध्ये डी. बी. खेडकर यांनी स्थापन केली. डी. बी. खेडकर म्हणजे महेश आणि राघवेंद्र बंधूंचे वडील. डी. बी. खेडकर या व्यवसायात उतरण्यापूर्वी पोलीस खात्यात कार्यरत होते. मुंबईतून सहायक पोलीस आयुक्त पदावरून ते निवृत्त झाले आणि त्यांनी या व्यवसायात उडी घेतली. कालांतराने महेश व राघवेंद्र खेडकर हे दोघेही त्यांचं महाविद्यालयीन शिक्षण पूर्ण झाल्यानंतर कंपनीत रूजू झाले. या एकत्र कुटुंबाच्या मेहनतीचं फळ म्हणून ही कंपनी वाढली, विस्तारली आणि यशस्वीही झाली.
महेश खेडकर यांनी बीसीएस तर राघवेंद्र खेडकर यांनी बी.कॉम, एल.एल.बी. पर्यंत शिक्षण घेतलं. या दोघा बंधूंचं महाविद्यालयीन शिक्षण जरी पुण्यात झालं असलं तरी शालेय शिक्षण मात्र राज्यातील विविध ठिकाणी झालं. कारण, वडील पोलीस खात्यात असल्याने त्यांची सतत बदली होई. शिक्षण पूर्ण झाल्यानंतर दोघा बंधूंनी कंपनीची सूत्रं आपल्या हाती घेतली. वडील डी. बी. खेडकरांनी कंपनीची पायाभरणी केली होतीच. ‘सिक्युरिटी सर्व्हिसेस’ अर्थात सुरक्षा सेवा पुरवण्यापासून कंपनीची सुरुवात झाली होती. त्यानंतर हाऊसकीपिंग सर्व्हिसेस, स्किल्ड-अनस्किल्ड मॅनपॉवर, लॉजिस्टिक कंपनी, सॉलिड वेस्ट मॅनेजमेंट आणि मग ट्रान्सपोर्टेशन अॅण्ड मोबिलिटी असा कंपनीचा विस्तार वाढतच गेला. आज सेवा आणि व्यवस्थापन क्षेत्रातील एक नामवंत कंपनी म्हणून ‘एसकेएसपीएल’ दिमाखात उभी आहे. कंपनीत कर्मचाऱ्यांची विद्यमान संख्या साडे आठ हजार इतकी असून ही संख्या २०२० पर्यंत १५ हजारापर्यंत पोहोचविण्याचे खेडकर बंधूंचे लक्ष्य आहे. दुसरीकडे, ‘एसकेएसपीएल’ची आजची वार्षिक आर्थिक उलाढाल १२५ कोटी रुपये असून २०२० पर्यंत ५०० कोटींपर्यंत नेण्याचे लक्ष्यही त्यांनी निर्धारित केले असून त्यादृष्टीने कंपनीची वाटचाल सुरू आहे.
- निमेश वहाळकर
माहितीच्या महापुरात रोजच्या रोज नेमका मजकूर मिळविण्यासाठी लाईक करा... facebook.com/MahaMTB/