मेवानीच्या मोर्चाच्या पार्श्वभूमीवर दिल्लीतील सुरक्षा व्यवस्थेत वाढ

पोलिसांनी परवानगी नाकारली असताना देखील मेवानी आणि त्याच्या साथीदारांनी दिल्लीतील संसद मार्गावर आज मोर्चाचे आयोजन केले आहे. त्यामुळे संसद मार्गावर पोलीस आणि निमलष्करी दलाच्या तुकड्या तैनात करण्यात आल्या आहेत. मेवानीच्या चिथावणीखोर वक्तव्यामुळे मोर्चादरम्यान कसलाही अनुचित प्रकार घडू नये, यासाठी दंगल विरोधी पथकांना देखील पाचारण करण्यात आले आहे. पोलीस प्रशासनाकडून विशेष काळजी घेण्यात येत आहे, यामुळे संसद मार्ग परिसरामध्ये सध्या प्रचंड तणावाचे वातावरण निर्माण झाले आहे.

मेवानी याच्या 'युवा हुंकार' या मोर्चाच्या पार्श्वभूमीवर मेवानीवर टीका करणारे पोस्टर्स दिल्लीतील काही नागरिकांकडून रस्त्यावर लावण्यात आले आहेत. मेवानी हा फक्त चिथावणीखोर वक्तव्य करून समाजामध्ये वाद लावण्याचे काम करत आहे. मोर्चा काढून चिथावणीखोर वक्तव्य करण्याऐवजी त्या लोकांपासून अडचण आहे, त्यांच्याशी सामोरासमोर येऊन चर्चा करावी, असे आव्हान त्याला पोस्टर्समधून करण्यात आले आहे.