संघाचे ज्येष्ठ प्रचारक विष्णुपंत मुठाळ यांचे निधन

मूळचे नरखेड तालुक्यातील लोहारी सावंगा या गावचे असलेल्या विष्णुपंतांचा जन्म दि. ८ फेब्रुवारी १९२३ ला झाला. अवघ्या चौदाव्या दिवशी त्यांचे मातृछत्र हरवले. १९५२ साली त्यांच्या वडिलांचे निधन झाले. शिक्षण घेत असताना तरोडेकर यांच्याशी त्यांचा संपर्क आला व ते दैनिक शाखेत जाऊ लागले. शिक्षण समाप्ती नंतर १९४६ पासून संघाचे प्रचारक म्हणून कार्यरत झाले व हे व्रत त्यांनी आजीवन पाळले. आपल्या जीवनाचा ७० वर्षापेक्षा जास्त काळ त्यांनी प्रचारक म्हणून व्यतीत केला.

नागपूर जिल्ह्यातून प्रचारक जीवनाची सुरुवात केल्यानंतर संघाचे द्वितीय सरसंघचालक गोळवलकर गुरुजी व तृतीय सरसंघचालक बाळासाहेब देवरस यांचे स्वीय सचिव म्हणून प्रदीर्घ काळ त्यांनी काम केले. १९४८ च्या संघबंदी मध्ये ते केंद्रीय कारागृहात होते. १९७५ च्या बंदिकाळात त्यांनी नागपूर व भंडारा येथे भूमिगत राहून काम केले. १९९५ पासून त्यांचा स्मृतिभवन रेशीमबाग येथे निवास होता. आपल्या आयुष्यात त्यांनी संघाच्या विविध सेवाकार्यांना उदार अंतःकरणाने अनेक देणग्या दिल्या. आपल्या संघजीवनात त्यांना संघाचे पहिल्या फळीचे विविध ज्येष्ठ प्रचारक तसेच जगद्गुरू शंकराचार्य यांचा दीर्घ सहवास लाभला.