बंगलोरच्या सूक्ष्म शिल्पकलाकाराने खडूवर साकारली योगासने

 

नवी दिल्ली : बंगलोरमधील सचिन संघे या सूक्ष्म शिल्पकलाकाराने खडूवर योगाची विविध आसने आणि पंतप्रधान नरेंद्र मोदी यांची प्रतिकृती साकारली आहे. आणि हे शिल्प सचिन संघे यांनी आज नरेंद्र मोदी यांना भेट स्वरुपात दिले आहे.

 

सचिन संघे हे पेशाने संगणकीय अभियंता (Software Engineer) आहेत. मात्र तरीही सूक्ष्म शिल्पकलेची आवड त्यांनी जोपासली आहे. खडूवरील सूक्ष्म शिल्पकलेसोबतच पेन्सिलच्या शिसावरही ते उत्तम शिल्प साकारतात. यापूर्वी त्यांनी सचिन तेंडूलकर, शिवरात्री विशेष शिल्प, ऑस्कर ट्रॉफी, भारताची राजमुद्रा, मातृदिन विशेष, भगवान महावीर, अमिताभ बच्चन असे अनेकांचे शिल्प साकारले आहे.

 

 

तसेच खडूवर त्यांनी भारताचे माजी पंतप्रधान लाल बहादूर शास्त्री, सामाजिक कार्यकर्त्या मदर टेरेसा, राष्ट्रपिता महात्मा गांधी, त्यांची दांडी यात्रा, २४ जैन तिर्थकर, राहुल द्रविड, नरेंद्र मोदी यांच्या वाढदिवसानिमित्त मोदी आणि त्यांची आई, सँताक्लॉज, ताजमहल, दूर्गा देवी, गणपती, बाळकृष्ण, बाहूबली, कबाली, भारताचे माजी राष्ट्रपती एपीजे अब्दुल कलाम, रक्षाबंधन विशेष यापासून ते सध्याचे राष्ट्रपती रामनाथ कोविंद आणि विरुष्का यांसारख्या दिग्गजांचे शिल्प साकारले आहे.

यापूर्वी सचिन यांना एमटीव्ही नेसकॅफे लॅब्सकडून स्टार अवॉर्डने सन्मामित करण्यात आले आहे. तसेच श्रवणबेळगोळ येथे झालेल्या राष्ट्रीय जैन युवा संम्मेलनामध्ये आदर्श जैन युवा पुरस्कार ही त्यांना प्रदान करण्यात आला आहे.

सचिन संघे यांना दस्तूरखुद्द अमिताभ बच्चन ट्विटरवर फॉलो करत असून त्यांच्या या सूक्ष्म शिल्पकलेचे स्मृती इराणी, राहुल द्रविड, रामनाथ कोविंद यांनीही कौतुक केले आहे.