गाळे प्रकल्प पूर्ण; २०९ उद्योजकांना मिळणार त्यांच्या हक्काची जागा

@@NEWS_SUBHEADLINE_BLOCK@@

    02-Jan-2018
Total Views |
 
 
 
नाशिक : औद्योगिक विकास महामंडळाने उभारलेला गाळे प्रकल्प पूर्ण झाला आहे. नव्या वर्षात त्यासाठी इच्छुकांचे अर्ज मागवून प्रक्रिया पूर्ण करण्यात येणार आहे. त्यामुळे किमान २०९ लघु उद्योजकांना हक्काची जागा मिळणार आहे. औद्योगिक क्षेत्रात सुमारे ७० टक्के लघु उद्योजक असून, आपापल्या परीने जागा मिळवून ते उद्योग करीत असतात. तथापि, सर्वच लघु उद्योजकांना शासकीय जागा उपलब्ध होत नसल्यामुळे भाड्याच्या जागेतच वर्षानुवर्षे व्यवसाय करावा लागत आहे. सध्या सातपूर आणि अंबड औद्योगिक वसाहतीत सुमारे पाचशेहून अधिक लघुउद्योजक आहेत. याशिवाय नव्या लघुउद्योगांची भर पडत असते. काही वर्षांपूर्वी राज्य शासनाने औद्योगिक वसाहतीतील रिक्त भूखंड खासगी विकासकांना देऊन त्यात इमारती बांधून विकण्याची मुभा दिली होती. त्यास विरोधही झाला होता. विकासकांना भूखंड देऊन बांधण्यापेक्षा औद्योगिक विकास महामंडळानेच गाळे बांधले तर कमी दरात उपलब्ध होतील, अशी भूमिका उद्योगमित्र संस्थेने घेतली होती.
 
 
 
त्यावर न्यायालयीन लढाई यशस्वी ठरली आणि औद्योगिक विकास महामंडळाने तीनपैकी एका भूखंडावर स्वत:ची इमारत बांधण्याचा निर्णय घेतला. त्यानुसार अंबड औद्योगिक वसाहतीत सिमेन्स कंपनीसमोर हर्ष कन्स्ट्रक्शनच्या माध्यमातून २०१५ मध्ये काम सुरू झालेली इमारत पूर्ण झाली आहे. सुमारे १४ हजार ८५० चौ.मी. क्षेत्रात बांधण्यात आलेल्या या इमारतीत २०९ गाळे असून, सहाशे ते अठराशे चौरस फूट आकाराचे भूखंड आहेत. आता जागेसाठी निविदा मागवून त्या स्थानिक तसेच यापूर्वीपासून उद्योग चालविणार्‍यांना देण्यात येणार आहेत.
 
 
दर कमी होण्याची प्रतीक्षा
 
औद्योगिक विकास महामंडळाच्या वतीने बांधण्यात आलेल्या फ्लॅटेड इमारतीत १४ हजार ८५० चौ.मी. क्षेत्रात ही इमारत बांधण्यात आली असून, ६०० ते १८०० अशा विविध आकारांचे एकूण २०९ गाळे उपलब्ध आहेत. या तीन मजली इमारतीत वाहनतळाची प्रशस्त जागा असून, पॅसेंजर आणि माल नेण्यासाठी स्वतंत्र लिफ्ट आहेत. औद्योगिक विकास महामंडळाने सध्याचा भाव हा ५,२५० रुपये प्रति चौरस फूट असा निश्चित केला असून, याच क्षेत्रात खासगी विकासकाने तीन हजार रुपये चौरस मीटर दराने गाळे विकल्याचे कागदोपत्री दाखवले असल्याने त्या आधारे याच दरानुसार नव्या इमारतीतील गाळ्यांचे वाटप करण्याची मागणी केली जात आहे.
 
 
@@AUTHORINFO_V1@@