रंगांची उधळण करणार्‍या वरोड्याच्या रंगकर्मीची झेप

वयाची ८० वर्षे रंगांची उधळण करणारा आणि विविध राजकीय सामाजिक विषयावर आपल्या व्यंगचित्रातून भाष्य करणारा हा रंगकर्मी तपस्वी आहे. मागील १५ वर्षांपासून ‘मार्मिक’मधील ‘काकड्यांची कोशिंबिर’ रसिकांच्या मनाचा ठाव घेत असतानाच शिवसेनाप्रमुख बाळासाहेब ठाकरे यांच्या सोबतचा स्नेह अधोरेखित होतो आणि त्यांची छाती इंचभर फुगते. बाळासाहेबांशी व्यक्तीश: परिचय असल्यामुळे ते ‘सामना’मध्ये व्यंगचित्र काढत राहिले. पुढे हा प्रवास ‘आवाज’, ‘जत्रा’, ‘वसंत’, ‘मार्मिक’, ‘उद्योजक’, ‘हंस’ आणि ‘किर्लोस्कर’ या मासिकांमधून व दिवाळी अंकांमधून वाट शोधत वाचकांना भूरळ घालत राहिला. व्यवसायाने वकिल असलेले काकडे रंगांच्या छटात हरवले आणि तेही एक हौशी कलावंत म्हणून. पैसा हे जगण्याच साधन आहे. ज्या क्षणी ते साध्य होते तेव्हा कलावंताच्या साधनेला बेड्या पडतात, असे ते सांगतात. जगण्याचा अर्थ चित्रात शोधत राहिलो आणि सामाजिक जाविणेतून समाजातील रंगिबिरंगी मुखवट्यांना आकार देत राहिलो. सामाजिक आशयाची व्यंगचित्रे दीर्घायुषी असतात, असा समज असणार्‍या या रंगकर्मीने आजपर्यंत कलेशी इमानदारी राखली आहे. 

नुकताच जर्मन विभाग, मुंबई विद्यापीठ आणि मराठी विकास संस्था यांच्या संयुक्त विद्यमाने मुंबई विद्यापीठात अन्य भाषकांना मराठी शिकविण्यासाठी सुरू असणार्‍या ‘माय मराठी’ या प्रकल्पासाठी अध्यापन सामग्री तयार करण्याचे काम सुरू आहे. या अभ्यासक्रमात जयवंत काकडे यांच्या एका सामाजिक आशयाच्या व्यंगचित्राचा समावेश करण्यात येणार आहे.